लोणी काळभोर : कुंजीरवाडी (ता. हवेली) येथील जेएसडब्ल्यू कंपनीच्या पार्किंगमध्ये उभ्या असलेल्या ट्रकमध्ये मध्यरात्री धक्कादायक प्रकार घडला. झोपेतून उठवल्याचा राग मनात धरून एका चालकाने सहकारी चालकाच्या हाताला चावा घेत त्याच्यावर टोकदार वस्तूने हल्ला केल्याची घटना ३० जून रोजी मध्यरात्री सुमारे एक वाजण्याच्या सुमारास घडली आहे. या हल्ल्यात जखमी झालेल्या चालकावर ससून रुग्णालयात उपचार सुरू असून, याप्रकरणी चालकाविरोधात लोणी काळभोर पोलीस ठाण्यात गुन्हा दाखल करण्यात आला आहे.
निशांतकुमार श्रीजयकुमार यादव (वय ४१) असे जखमी झालेल्या चालकाचे नाव आहे. विनोद कुमार गुप्ता असे गुन्हा दाखल करण्यात आलेल्या चालकाचे नाव आहे. पोलिसांनी दिलेल्या माहितीनुसार, निशांतकुमार यादव हे ग्रीन लाईन ट्रान्सपोर्ट कंपनीमध्ये चालक म्हणून कार्यरत असून, कुंजीरवाडी येथील जेएसडब्ल्यू कंपनीच्या पार्किंगमध्ये ट्रक क्रमांक MH-14-KQ-4047 मध्ये इतर चालकांसह थांबले होते.
सर्वांनी जेवण केल्यानंतर चालक विनोद कुमार गुप्ता ट्रकच्या केबिनमध्ये झोपला होता. काही वेळानंतर त्याला उठविण्यासाठी निशांतकुमार यादव यांनी हलवले. मात्र, झोपेतून जागे झालेल्या विनोद कुमारने संतापाच्या भरात त्यांच्या डाव्या हाताच्या करंगळीला आणि मनगटाजवळ चावा घेतला. एवढ्यावरच न थांबता ट्रकमध्ये पडलेल्या एका टोकदार वस्तूने त्यांच्या पोटाच्या डाव्या बाजूला वार केल्याचा आरोप फिर्यादीत करण्यात आला आहे.
या हल्ल्यात निशांतकुमार यादव जखमी झाले. त्यानंतर त्यांचे सहकारी चालक रोहित कुमार यांनी त्यांना तातडीने ससून रुग्णालयात दाखल केले. सध्या त्यांच्यावर उपचार सुरू असून प्रकृती स्थिर असल्याचे सांगण्यात आले.या प्रकरणी जखमी चालकाच्या फिर्यादीवरून आरोपी विनोद कुमार गुप्ता याच्याविरोधात लोणी काळभोर पोलिसांकडे तक्रार दाखल करण्यात आली असून, पुढील तपास सुरू आहे.
