Nanded Crime : जिल्ह्यातील माहूर तालुक्यात 20 नोव्हेंबर दुपारी घडलेल्या दुहेरी हत्याकांडाने परिसरात खळबळ उडाली आहे. पाचोन्दा शिवारात स्वतःच्या शेतात कापूस वेचत असताना दोन सख्ख्या जावांची अज्ञात व्यक्तीने गळा दाबून हत्या केल्याची माहिती समोर आली आहे. मृत महिलांमध्ये अंतकलाबाई अशोक अडागळे (वय 60) आणि अनुसयाबाई साहेबराव अडागळे (वय 45) यांचा समावेश आहे. (Nanded Latest Crime News)
काय घडलं? (Nanded Crime)
पोलिसांच्या प्राथमिक माहितीनुसार, दुपारी साधारण 3 ते 3.30 वाजण्याच्या सुमारास या दोन्ही महिला नियमितप्रमाणे शेतात काम करत होत्या. त्याचवेळी एका अज्ञात हल्लेखोराने दोघींना गळा दाबून ठार केले. घटनास्थळी झटापटीचे काही पुरावेही आढळले आहेत. तसेच मृत महिलांच्या अंगावरील दागिने आणि काही रोख रक्कम गायब असल्याची माहिती समोर आली आहे. त्यामुळे हा प्रकार केवळ हत्या नसून लूट करण्याच्या उद्देशाने घडल्याचा संशय पोलिसांनी व्यक्त केला आहे.
हेही वाचा: पुणे मनपा निवडणुकीत शिंदे गट ठाकरेंच्या नेत्याच्या ‘होमग्राऊंड’मधून प्रचाराचा नारळ फोडणार…
या घटनेने माहूर तालुका हादरला असून नागरिकांमध्ये भीतीचे वातावरण निर्माण झाले आहे. पोलिसांनी गुन्हा दाखल करून तपास सुरू केला असून हा हल्ला लुटमारीसाठी झाला की वैयक्तिक वादातून, याचा शोध घेतला जात आहे.
