पुणे : भ्रष्टाचाराला आळा घालण्यासाठी आणि नागरिकांमध्ये जनजागृती निर्माण करण्यासाठी लाचलुचपत प्रतिबंधक विभागाच्या (ACB) पुणे घटकाकडून २६ ऑक्टोबर ते १ नोव्हेंबर २०२६ या कालावधीत दक्षता जनजागृती सप्ताह साजरा करण्यात येणार आहे. या सप्ताहानिमित्त पुणे जिल्ह्यातील विविध तालुके, शासकीय कार्यालये, शैक्षणिक संस्था आणि सार्वजनिक ठिकाणी जनजागृतीपर कार्यक्रम आयोजित करण्यात येणार आहेत.
महाराष्ट्र शासनाच्या सामान्य प्रशासन विभागाच्या निर्देशानुसार हा सप्ताह आयोजित करण्यात येत आहे. भ्रष्टाचार निर्मूलन, पारदर्शक प्रशासन आणि नागरिकांमध्ये भ्रष्टाचारविरोधी जागरूकता निर्माण करणे हा या उपक्रमाचा उद्देश आहे. यानिमित्त निबंध, वक्तृत्व आणि वादविवाद स्पर्धा, व्याख्याने, कार्यशाळा, पथनाट्य तसेच विविध प्रबोधनात्मक कार्यक्रमांचे आयोजन केले जाणार आहे. समाजमाध्यमे, व्हॉट्सअॅप, एसएमएस आणि ई-मेलच्या माध्यमातूनही भ्रष्टाचारविरोधी संदेश नागरिकांपर्यंत पोहोचवले जाणार आहेत.
सोमवारी (२६ ऑक्टोबर) पुणे शहरातील जिल्हाधिकारी कार्यालय, जिल्हा परिषद, विभागीय आयुक्त कार्यालय, पुणे पोलीस आयुक्तालय, ससून सर्वोपचार रुग्णालय, महावितरण कार्यालय तसेच यवत, दौंड, भिगवण, इंदापूर आणि लोणी काळभोर परिसरात जनजागृतीचे उपक्रम राबवले जाणार आहेत.
मंगळवारी (२७ ऑक्टोबर) पिंपरी-चिंचवड महानगरपालिका, पोलीस आयुक्तालय, विविध क्षेत्रीय कार्यालये, आकुर्डी, निगडी, देहूरोड, तळेगाव दाभाडे, लोणावळा आणि खंडाळा परिसरात कार्यक्रम होणार आहेत. बुधवारी (२८ ऑक्टोबर) पुणे रेल्वे स्टेशन, बसस्थानक परिसर, आरटीओ कार्यालय, राज्य उत्पादन शुल्क विभाग, म्हाडा कार्यालय आणि शहरातील विविध क्षेत्रीय कार्यालयांमध्ये जनजागृती केली जाणार आहे.
गुरुवारी (२९ ऑक्टोबर) औंध, बाणेर, पिंपरी, चिंचवड, सासवड, जेजुरी आणि बारामती परिसरात, तर शुक्रवारी (३० ऑक्टोबर) नगर रोड, चंदननगर, हडपसर, वानवडी, मुंढवा, भोर आणि वेल्हे परिसरात उपक्रम राबवले जाणार आहेत. शनिवारी (३१ ऑक्टोबर) भोसरी, नाशिक रोड, आळंदी आणि दिघी परिसरात, तर रविवारी (१ नोव्हेंबर) चाकण, राजगुरुनगर, खेड, मंचर, नारायणगाव, जुन्नर, लोणीकंद, शिक्रापूर आणि शिरूर परिसरात जनजागृती कार्यक्रम आयोजित करण्यात येणार आहेत.
