पुणे : पुण्यातील येरवडा परिसरातील रामनगर येथे किरकोळ वादातून एका व्यक्तीने आपल्या परिचिताच्या मुलावर ॲसिडसदृश द्रवपदार्थ फेकल्याची धक्कादायक घटना घडली आहे. हल्ल्यादरम्यान झालेल्या झटापटीत बाटलीतील द्रवाचे शिंतोडे रस्त्यावरून जाणाऱ्या दुचाकीस्वार आणि त्याच्या लहान मुलीच्या अंगावरही उडाले. या घटनेत एका चिमुकलीसह एकूण चौघेजण जखमी झाले आहेत. याप्रकरणी येरवडा पोलिसांनी मुख्य आरोपीला अटक केली आहे.
नितीन सुंदर जाधव (वय ५२, रा. पांढूलमाण वस्ती, येरवडा) असे अटक करण्यात आलेल्या आरोपीचे नाव आहे. दिवाळीच्या तोंडावर शुक्रवारी (६ नोव्हेंबर) दुपारी ही घटना घडली.
पोलिसांनी दिलेल्या माहितीनुसार, फिर्यादी सुमित्रा इंद्रपाल डग्ग्या (वय ५२, रा. रामनगर, येरवडा) आणि आरोपी नितीन जाधव हे एकमेकांच्या परिचयाचे आहेत. सुमित्रा यांचा मुलगा आणि आरोपी यांच्यात मैत्री होती. मात्र, काही दिवसांपूर्वी दोघांमध्ये वाद झाला होता. याच जुन्या वादाचा राग मनात धरून शुक्रवारी दुपारी चारच्या सुमारास आरोपी जाधव हा ॲसिडसदृश द्रवपदार्थाची बाटली घेऊन सुमित्रा यांच्या घरासमोर आला.
तिथे त्याने सुमित्रा यांना शिवीगाळ केली आणि त्यांच्या मुलाला मारहाण करण्याचा प्रयत्न केला. त्यानंतर मुलाच्या अंगावर बाटलीतील द्रवपदार्थ फेकला. हा प्रकार रोखण्यासाठी सुमित्रा यांनी आरोपीच्या हातातील बाटली ताब्यात घेण्याचा प्रयत्न केला.
यावेळी झालेल्या झटापटीत बाटलीतील द्रवाचे शिंतोडे रस्त्यावरून जाणाऱ्या दुचाकीस्वारासह त्याच्या लहान मुलीच्या अंगावर उडाले. या घटनेत सुमित्रा डग्ग्या, त्यांचा मुलगा, दुचाकीस्वार आणि त्याची लहान मुलगी असे एकूण चौघेजण जखमी झाले. सर्व जखमींवर सध्या रुग्णालयात उपचार सुरू आहेत.
घटनेची गंभीर दखल घेत येरवडा पोलिसांनी सुमित्रा डग्ग्या यांच्या तक्रारीवरून गुन्हा दाखल केला. त्यानंतर तातडीने कारवाई करत आरोपी नितीन सुंदर जाधव याला अटक करण्यात आली. जखमींना गंभीर दुखापत झाल्याप्रकरणी आरोपीविरुद्ध कायदेशीर कारवाई सुरू आहे. दिवसाढवळ्या घडलेल्या या घटनेमुळे येरवडा परिसरात खळबळ उडाली आहे.
