पुणे : पुण्यात सायबर भामट्यांचा सुळसुळाट वाढला असून, नागरिकांना वेगवेगळ्या प्रलोभनांत आणि धमक्यांत अडकवून लुटण्याचे प्रकार समोर आले आहेत. ‘डिजिटल अरेस्ट’, अमली पदार्थांच्या तस्करीची भीती आणि आभासी चलनात (क्रिप्टोकर आय) गुंतवणुकीचे आमिष दाखवून सायबर चोरांनी लाखांची फसवणूक केल्याच्या घटना घडल्या आहेत.
कर्वेनगरमधील ७५ वर्षीय ज्येष्ठ महिलेला सायबर चोरट्यांनी गंडा घातला. नाशिकमधील एका बँकेची २कोटी रुपयांची फसवणूक झाली असून, त्यात तुमचे नाव असल्याचे सांगून चोरांनी त्यांना ‘डिजिटल अरेस्ट’ची भीती दाखवली. मालमत्ता जप्त करण्याची धमकी देऊन कारवाई टाळण्याच्या नावाखाली या महिलेकडून आरटीजीएसद्वारे ३२ लाख रुपये उकळण्यात आले. नंतर आणखी पैशांची मागणी केल्यावर हा प्रकार फसवणुकीचा असल्याचे उघडकीस आले. वारजे पोलीस ठाण्यात याप्रकरणी गुन्हा नोंदवला असून पोलीस पुढील तपास करत आहेत.
दुसऱ्या एका घटनेत, आंबेगाव बुद्रुकमधील एका नागरिकाला दिल्लीच्या दूरसंचार विभागातून बोलत असल्याचे भासवत सायबर चोरांनी टार्गेट केले. मोबाईल क्रमांकाचा वापर ड्रग्स तस्करीमध्ये झाल्याचे सांगून त्यांना अटकेची भीती दाखवण्यात आली. या कारवाईतून वाचण्यासाठी ५ लाख २० हजार रुपये उकळण्यात आले. भारती विद्यापीठ पोलीस या प्रकरणाचा तपास करत आहेत.
तिसऱ्या घटनेत, बिबवेवाडी भागात एका तरुण व्यावसायिकाची ५ लाख १३ हजार रुपयांची फसवणूक झाली. आभासी चलनात भरघोस परतावा मिळण्याचे आमिष दाखवून चोरांनी त्याला जाळ्यात ओढले आणि पैसे उकळले. परतावा न मिळाल्याने तरुणाने पोलिसांत धाव घेतली असून, बिबवेवाडी पोलीस अधिक तपास करत आहेत. सायबर भामटे नागरिकांना अशा भूलथापा देत असून, कोणत्याही संशयास्पद कॉल्स किंवा धमक्यांना बळी न पडण्याचे आवाहन पोलिसांकडून करण्यात येत आहे.
