पुणे : पत्नीचा शारीरिक आणि मानसिक छळ केल्यासह बेकायदा गर्भलिंगनिदान करून बळजबरीने गर्भपात केल्याच्या गंभीर आरोपांमुळे अडचणीत आलेल्या पोलीस उपनिरीक्षकाला पुणे सत्र न्यायालयाने मोठा धक्का दिला आहे. आरोपी पोलीस उपनिरीक्षक धनाजी टोणे यांचा अटकपूर्व जामीन अर्ज न्यायालयाने फेटाळला आहे. मात्र, या प्रकरणातील सहआरोपी असलेल्या त्यांच्या ७० वर्षीय आई अनुसया टोणे यांना सशर्त अटकपूर्व जामीन मंजूर करण्यात आला आहे.
या प्रकरणाच्या सुनावणीदरम्यान अतिरिक्त सत्र न्यायाधीश एच. एम. भोसले यांनी आरोपीच्या कृत्याबाबत कठोर निरीक्षण नोंदवले. बेकायदा गर्भपात हा अत्यंत गंभीर गुन्हा आहे. आरोपी स्वतः जबाबदार पोलीस अधिकारी असूनही अशा बेकायदा कृत्यांमध्ये त्याचा सहभाग असणे, ही समाजासाठी अतिशय धोकादायक बाब असल्याचे न्यायालयाने आदेशात नमूद केले.
या प्रकरणात धनाजी टोणे यांची ७० वर्षीय आई अनुसया टोणे यांचाही सहआरोपी म्हणून समावेश आहे. न्यायालयाने त्यांना २० हजार रुपयांच्या जातमुचलक्यावर आणि हमी रकमेवर सशर्त अटकपूर्व जामीन मंजूर केला आहे. मात्र, पोलीस उपनिरीक्षक धनाजी टोणे यांचा जामीन अर्ज फेटाळण्यात आला.
पत्नीचा शारीरिक आणि मानसिक छळ केल्यासह बेकायदा गर्भलिंगनिदान आणि बळजबरीने गर्भपात केल्याचे गंभीर आरोप या प्रकरणात करण्यात आले आहेत. पोलीस दलातीलच एका अधिकाऱ्यावर असे आरोप झाल्याने या प्रकरणाची चर्चा सुरू झाली आहे. न्यायालयाने अटकपूर्व जामीन नाकारल्याने आता तपासाच्या पुढील प्रक्रियेकडे लक्ष लागले आहे.
