पुणे :राज्यात पावसाचा जोर ओसरल्यानंतर हवामानात हळूहळू बदल होताना दिसत आहे. गेल्या काही दिवसांपासून पावसाने उघडीप दिली असून, तापमानातही घट होण्यास सुरुवात झाली आहे. त्यामुळे दिवसा उन्हाचा चटका, तर रात्री हवेत गारवा असे संमिश्र वातावरण महाराष्ट्रातील नागरिक अनुभवत आहेत. दरम्यान, पुढील चार ते पाच दिवस राज्यातील बहुतांश भागांत हवामान कोरडे राहण्याचा अंदाज हवामान विभागाने व्यक्त केला आहे. सध्या कोणताही हवामान अलर्ट जारी करण्यात आलेला नाही.
कोकणासह राज्यातील विविध भागांत थंडीची चाहूल लागण्यास सुरुवात झाली आहे. दिवसा उष्णता जाणवत असली, तरी रात्रीच्या तापमानात घट होत असल्याने गारवा वाढत आहे. पुढील काही दिवस पावसाची शक्यता कमी असून, बहुतांश भागांत आकाश निरभ्र आणि हवामान कोरडे राहण्याचा अंदाज आहे.
उत्तर महाराष्ट्रातील धुळे, नंदुरबार, नाशिक आणि जळगाव परिसरात सकाळच्या वेळी तुलनेने उष्ण, तर रात्री थंड वातावरण अनुभवायला मिळत आहे. या भागातील कमाल तापमान ३२ अंश सेल्सिअसच्या आसपास राहण्याची शक्यता आहे. पुढील काही दिवस हवामान कोरडे राहण्याचा अंदाज आहे.
पश्चिम महाराष्ट्रात पुण्यासह परिसरात कोरडे हवामान कायम राहणार आहे. या भागात कमाल तापमान २९ अंश, तर किमान तापमान २१ अंश सेल्सिअसच्या आसपास राहण्याची शक्यता आहे. हवेत काही प्रमाणात आर्द्रता असली, तरी रात्रीच्या तापमानात घट होत असल्याने गारवा जाणवू लागला आहे.
मराठवाड्यातही सध्या पावसाने उघडीप दिली असून, हवामान कोरडे आहे. या भागात कमाल तापमान ३३ अंश, तर किमान तापमान २२ अंश सेल्सिअसच्या आसपास नोंदवले जात आहे. पुढील दोन ते तीन दिवस उष्ण आणि कोरडे हवामान कायम राहण्याचा अंदाज हवामान विभागाने व्यक्त केला आहे.
विदर्भात पावसाचा जोर कमी झाल्यानंतर आता थंडीची चाहूल लागली आहे. या भागात कमाल तापमान ३१ अंश, तर किमान तापमान २१ अंश सेल्सिअसच्या आसपास राहण्याचा अंदाज आहे. पुढील चार ते पाच दिवस पावसाचा कोणताही अलर्ट नसून हवामान कोरडे राहण्याची शक्यता आहे.
एकूणच, दिवाळीच्या काळात राज्यात दिवसा उष्णता आणि रात्री गारवा असे वातावरण कायम राहण्याची शक्यता आहे. पुढील चार ते पाच दिवस बहुतांश भागांत पावसाची शक्यता नसल्याने नागरिकांना कोरड्या हवामानाचा अनुभव येणार आहे.
