पुणे : दिवाळीच्या पार्श्वभूमीवर पुणे पोलिसांनी फटाक्यांची विक्री आणि वापराबाबत कडक नियमावली जाहीर केली आहे. सार्वजनिक ठिकाणी नियमांचे उल्लंघन करून फटाके फोडणाऱ्यांवर गुन्हे दाखल केले जाऊ शकतात, असा इशारा पोलीस प्रशासनाने दिला आहे. नागरिकांची सुरक्षा, ध्वनिप्रदूषणावर नियंत्रण आणि सार्वजनिक ठिकाणी होणारे अपघात टाळण्यासाठी हे निर्बंध लागू करण्यात आले आहेत.
नियमावलीनुसार, सार्वजनिक रस्ते, पदपथ तसेच रस्त्यापासून १० मीटरच्या आत फटाके फोडण्यास मनाई करण्यात आली आहे. तसेच तात्पुरत्या फटाके विक्री स्टॉलच्या ५० मीटर परिसरात आतषबाजी करता येणार नाही. विदेशी बनावटीच्या फटाक्यांची विक्री करण्यासही बंदी घालण्यात आली आहे.
दिवाळीनिमित्त फटाके विक्रीसाठी ६ नोव्हेंबर ते ५ डिसेंबर २०२६ या कालावधीत तात्पुरते परवाने दिले जाणार आहेत. परवान्याची मुदत संपल्यानंतर विक्रेत्यांना फटाक्यांची विक्री करता येणार नाही. विक्री न झालेला शिल्लक साठा अधिकृत गोदामात किंवा घाऊक परवानाधारकाकडे जमा करणे बंधनकारक राहणार आहे.
ध्वनिप्रदूषण रोखण्यासाठी फटाक्यांच्या आवाजावरही निर्बंध घालण्यात आले आहेत. फटाके फोडण्याच्या ठिकाणापासून चार मीटर अंतरावर १२५ डेसिबलपेक्षा जास्त आवाज निर्माण करणाऱ्या फटाक्यांचे उत्पादन, विक्री आणि वापर करण्यास बंदी आहे. तसेच १०० पेक्षा अधिक फटाके असलेल्या साखळी बॉम्बवर आणि विशिष्ट प्रकारच्या अॅटमबॉम्बवरही कायदेशीर निर्बंध लागू राहतील.
ध्वनिप्रदूषण नियंत्रण नियमांनुसार, रात्री १० ते सकाळी ६ या वेळेत आवाज करणारे फटाके फोडता येणार नाहीत. नियमांच्या अधीन राहून कमी आवाजाचे प्रकाश व रंगांची आतषबाजी करणारे फटाके आणि पर्यावरणपूरक ग्रीन फटाके वापरण्यास मुभा असेल. रुग्णालये, शैक्षणिक संस्था आणि न्यायालयांच्या सभोवतालचा १०० मीटर परिसर शांतता क्षेत्र असल्याने या ठिकाणी फटाके फोडण्यास मनाई असेल.
