बीड : शिवसंग्रामचे नेते आणि माजी आमदार दिवंगत विनायक मेटे यांचे लहान भाऊ रामहरी मेटे यांनी शिवसंग्रामला रामराम ठोकत स्वतंत्र संघटना स्थापन केली आहे. जय शिवसंग्राम या संघटनेच्या माध्यमातून काम करून विनायक मेटे विचार सामान्यांपर्यंत पोहचवणार असल्याचे रामहरी यांनी सांगितले. त्यांच्याकडे या आगोदर युवा जिल्हाध्यक्ष पद होते. परंतु, विनायक मेटे यांच्या निधनानंतर त्यांनी हे पद सोडले होते. शिवंग्राममधील अंतर्गत धुसफूस आणि त्यामध्ये होत असलेली घुसमट यामुळेच त्यांनी वेगळा निर्णय घेतल्याचे सांगण्यात येत आहे. रामहरी मेटे बाहेर पडणे हे शिवसंग्रामला मोठा धक्का समजला जात आहे.
दिवंगत विनायक मेटे हे विधान परिषद सदस्य होते. त्यांनी शिवसंग्रामच्या माध्यमातून राज्यभर सामान्यांसाठी आवाज उठवत अनेक प्रश्न मार्गी लावले. मराठा आरक्षण, शेतकऱ्यांचे प्रश्न यावर ते कायम भूमिका मांडत असत. १४ ऑगस्ट २०२२ रोजी मुंबई-पुणे एक्स्प्रेस वे वर झालेल्या अपघातात त्यांचे निधन झाले. त्यांचा मृत्यू झाल्यानंतर संघटनेची सर्व जबाबदारी त्यांची पत्नी डॉ.ज्योती मेटे यांच्या खांद्यावर आली. तसेच विनायक मेटे यांच्या निधनानंतर युवा जिल्हाध्यक्ष तथा मेटे यांचे लहान बंधू रामहरी मेटे हे पदावरून बाजूला झाले.
मागील काही दिवसांपासून ते शिवसंग्रामपासून अंतर राखून होते. ते नाराज असल्याचीही चर्चा होती. शिवसंग्राममध्ये ठराविक लोकांचीच जास्त चलती आहे, असे त्यांनी अनेकदा कार्यकर्त्यांजवळ बोलून दाखविले होते. त्यामुळेच त्यांनी राज्यातील सर्व पदाधिकाऱ्यांशी बोलून शिवसंग्राममधून बाहेर पडत जय शिवसंग्राम ही स्वतंत्र संघटना उघडली आहे. शिवसंग्राममधून बाहेर पडत असल्याची घोषणा त्यांनी गुरूवारी केली. यामुळे शिवसंग्रामला मोठा धक्का बसला आहे.
