श्रीवर्धन: गुरुवारी शिर्डी येथील सभेत बोलताना पंतप्रधान नरेंद्र मोदी यांनी राष्ट्रवादी काँग्रेसचे अध्यक्ष शरद पवार यांनी शेतकऱ्यांसाठी काय केले, असा प्रश्न केला. पण, त्यात त्यांनी 70 हजार कोटींचा उल्लेख केला नसल्याचे वक्तव्य माजी मुख्यमंत्री उद्धव ठाकरे यांनी म्हटले. नरेंद्र मोदी यांनी 70 हजार कोटी रुपयांचा उल्लेख केला नाही. कारण, तिथे स्टेजवर कोणीतरी बसलं होतं, असे म्हणत पंतप्रधान मोदी आणि उपमुख्यमंत्री अजित पवार यांच्यावर निशाणा साधला. तसेच शरद पवारांनी 70 हजार कोटींची कर्जमाफी केली, असल्याचेही ठाकरे यांनी म्हटले.
रायगड जिल्हा मध्यवर्ती सहकारी बॅंक लिमिटेड स्थलांतरीत श्रीवर्धन शाखेचा उद्घाटन सोहळा शुक्रवारी पार पडत आहे. या कार्यक्रमासाठी राष्ट्रवादी काँग्रेस पक्षाचे अध्यक्ष शरद पवार, शिवसेना ठाकरे गटाचे पक्षप्रमुख उद्धव ठाकरे, काँग्रेस नेते आणि माजी मुख्यमंत्री पृथ्वीराज चव्हाण, माजी खासदार अनंत गीते आदी उपस्थित आहेत. या कार्यक्रमाच्या निमित्ताने ‘इंडिया’ आघाडीचे सर्व नेते एकाच व्यासपीठावर आले आहेत.
यावेळी उद्धव ठाकरे यांनी म्हटले की, मी जेव्हा कार्यक्रम स्थळी आलो, त्यावेळी वाटलं की मी आताच्या मुख्यमंत्र्यांच्या सभेला आलो आहे की काय? कारण समोर खुर्च्या मोकळ्या होत्या. यांच्यात सध्या खुर्चीसाठी मारामार सुरु आहे. परंतु, बाहेर त्यांच्या सभेला मात्र खुर्च्या खाली असतात. व्यासपीठावर आज राष्ट्रवादी, काँग्रेस आणि शिवसेनेचे, शेकापचे पदाधिकारी उपस्थित आहे. यापूर्वी आमच्या मारामाऱ्या व्हायच्या. आता एक नवीन समीकरण तयार झालं आहे. सध्या फक्त मी आणि मीच सुरू आहे, त्या विरोधात आपण एकत्र आलो आहेत. आमचा कोणत्याही व्यक्तीला नाही तर वृत्तीला आहे.
शिर्डीत पंतप्रधान नरेंद्र मोदी यांनी 70 हजार कोटी रुपयांचा उल्लेख केला नाही. कारण त्या स्टेजवर कोणीतरी बसलं होतं. पंतप्रधान म्हणाले की, शरद पवार यांनी शेतीसाठी काही केलं नाही. परंतु, 70 हजार कोटी रुपयांची कर्जमाफी ही खासदार शरद पवारांनीच केली होती, असेही उद्धव ठाकरे यांनी म्हटले.
