ठाणे : लग्नात नाचताना धक्का लागल्याच्या रागातून 21 वर्षीय तरुणाची 17 वर्षीय दोन अल्पवयीन तरूणांनी चाकूने भोसकून हत्या केल्याची घटना घडली आहे.
ही घटना शहापूर तालुक्यातील काजगाव परिसरात घडली. याप्रकरणी शहापूर पोलिस ठाण्यात खुनाचा गुन्हा दाखल करण्यात आला आहे. बाळू वाघ (वय 21, रा. काजगाव शहापूर) असे हत्या झालेल्या तरुणाचं नाव आहे. याप्रकरणी दोन्ही अल्पवयीन आरोपींना पोलिसांनी अटक केली आहे.
पोलिसांनी दिलेल्या माहितीनुसार, मृत बाळू वाघ हा शहापूर तालुक्यातील काजगावमध्ये कुटुंबासोबत राहत होता. उदर्निवाहसाठी गावातच ट्रॅक्टर चालकाचं काम करत होता. शहापूर तालुक्यातील काजगाव हद्दीत 25 मार्च रोजी लग्न होते. या लग्नात नाचत असताना बाळूचा धक्का 17 वर्षीय मुलाला लागला. तेथे त्यांच्यात वाद झाला. त्यानंतर या दोन्ही अल्पवयीन मुलांनी त्या तरुणाला निर्जनस्थळी गाठले. त्याच्यावर धारदार चाकूने वार करत हत्या केली. नंतर त्याचा मृतदेह भातसा नदीत फेकून दिला. मृतदेह फेकून ते घटनास्थळावरून पसार झाले.
दरम्यान, शहापूर तालुक्यातील कासगाव परिसरातील पावर हाऊस वज्र प्रकल्पातील नदी पात्रात 26 मार्चला दुपारच्या सुमारास मृतदेह तरंगतांना दिसून आला. घटनेची माहिती मिळताच शहापूर पोलिस घटनास्थळी दाखल झाले. त्यानंतर मृतदेह नदी पात्रातून बाहेर काढण्यात आला.
नदीपात्रातून मृतदेह काढल्यानंतर शवविच्छदनासाठी शहापूर उपजिल्हा रूग्णालयात नेण्यात आला. त्यानंतर बाळू वाघ यांची हत्या झाल्याचे शवविच्छदनाच्या अहवालातून समोर आले. त्यानंतर शहापूर पोलिसांनी अज्ञात आरोपींविरुद्ध खुनाचा गुन्हा दाखल केला. पोलिसांनी तपासाची चक्रे फिरवत या गुन्हयातील दोन्ही 17 वर्षीय अल्पवयीन आरोपींना ताब्यात घेतलं. दोन्ही आरोपींना न्यायालयात हजर केलं असता त्यांची रवानगी भिवंडीतील बालसुधार गृहात करण्यात आली आहे.
