पेण : पेण तालुक्यातील हमरापूर, तरणखोप व जिते विभागातील गावांना गेल्या महिन्यापासून सिडकोच्या मुख्य जलवाहिनीतून मातीमिश्रित, दुर्गंधीयुक्त दूषित पाणीपुरवठा होत आहे. त्यामुळे ग्रामीण भागातील नागरिकांच्या आरोग्याचा प्रश्न निर्माण झाला असून याबाबत संबंधितांनी तत्काळ लक्ष देऊन उपाययोजना करावी, अशी मागणी नागरिकांकडून केली जात आहे.
पेण येथील हेटवणे धरणातून होणारा पाणीपुरवठा सिडकोच्या जलवाहिनीतून हमरापूर, तरणखोप व जिते विभागातील गावांना पाणीपुरवठा गेला जातो. मात्र, गेल्या काही दिवसांपासून येथे गढूळ, दुर्गंधीयुक्त पाणीपुरवठा होत असल्याने येथील नागरिकांना पोटदुखी, उलटी, मळमळ होऊ लागल्याने ते त्रस्त झाले आहेत.
हेटवणे धरणात पाणीसाठा मोठ्या प्रमाणावर उपलब्ध आहे, तरीही गढूळ पाणी येत असल्याने या भागातील काही नागरिक विकतचे तर काही जण अन्य ठिकाणांहून पाणी आणत आहेत. त्यातच आता पावसाळा सुरू झाला आहे. त्यामुळे रोगराई पसरण्याची शक्यता नाकारता येत नाही. त्यामुळे रायगड जिल्हा परिषदेचे मुख्य कार्यकारी अधिकारी आणि पाणीपुरवठा विभाग अधिकाऱ्यांनी याप्रकरणी तातडीने लक्ष घालून नागरिकांना शुद्ध पाणीपुरवठा उपलब्ध करून द्यावा, अशी मागणी येथील ग्रामस्थांनी संबंधित विभागाकडे निवेदनाद्वारे केली आहे.
