कल्याण: कल्याणमधून एक धक्कादायक घटना समोर आली आहे. येथे एका रिक्षा चालकाने घरात घुसून दोन अल्पवयीन शाळकरी मुलींचा विनयभंग केल्याचे समोर आले आहे. हेमंत पवार असे नराधम आरोपीचे नाव आहे.कल्याण तालुका पोलीस ठाण्याच्या हद्दीत ही घटना घडली आहे. यामुळे शहरात खळबळ उडाली आहे. कल्याण तालुका पोलीसांनी गुन्हा दाखल करत आरोपीला अटक केली आहे.
मिळालेल्या माहितीनुसार, यातील एक पीडिता 14 वर्षांची आहे तर दुसरी 12 वर्षांची आहे. नराधम हेमंत पवार नावाच्या एका रिक्षा चालकाने घरात शिरून दोन शाळकरी अल्पवयीन बहिणींचा विनयभंग केल्याची धक्कादायक घटना उघडकीस आली आहे. तक्रारीनुसार आरोपी पवार कल्याण तालुक्यातील घोटसई गावचा रहिवासी आहे. “मुली आवडतात म्हणून” या रिक्षा चालकाने भर दिवसा घरात शिरून दोन्ही विद्यार्थिनीचा विनयभंग केल्याचा प्रकार समोर आला. या प्रकरणी आरोपी पवार वर कल्याण तालुका टिटवाळा पोलिस ठाण्यात गुन्हा दाखल केला असून पोलिसांनी अटक केली आहे. मात्र या घटनेमुळे परिसरात भीतीचे वातावरण असून महिला आणि मुलींच्या सुरक्षेचा गंभीर प्रश्न उभा राहीला आहे.
नेमकं ‘काय’ घडलं?
रविवारी संध्याकाळी रिक्षाचालक पवार पीडित मुलींच्या घरात घुसला एका घरात घुसला असता तु घरात का आलास असे मुलीने त्याला विचारणा केली. तेंव्हा तु मला आवडतेस असं म्हणत पीडितेचा विनयभंग केला. घडलेला प्रकार कोणाला सांगितला तर तुम्हा दोघींना मी शाळेमधून उचलून नेईन, अशी धमकीही दिली आरोपी घरात शिरला असताना त्याने बालिकेचा हात पकडला. पीडितेने त्याचा हात झटकला. आणि त्याला घरातून निघून जाण्यास सांगितले. हा प्रकार सुरू असताना पीडितेची अल्पवयीन मावस बहिण घरात आली. तेंव्हा इसमाने मावस बहिणीच्या खांद्यावर हात टाकून तिलासुद्धा तू मला खूप आवडतेस, असे म्हणत तिचा हात पकडत स्वयंपाक घरापर्यंत ओढत नेले. घडलेला प्रकार तुम्ही कुटुंबीयांना सांगितला तर तुम्हाला शाळेमधून उचलून घेऊन जाईन अशी आरोपी पवारने धमकी दिली.
एका पीडितेची आई रात्री मजुरी करून घरी आली असता. तिने घडलेला प्रकार आईला सांगितला. त्यानंतर आईने दोन्ही पीडित बालिकांसह टिटवाळा पोलीस ठाण्यात जाऊन गुन्हा दाखल करून घेतला. याप्रकरणाचा तपास पोलीस उपनिरीक्षक प्रशांत जाधव करत आहेत.
