शिरूर: अल्पवयीन मुलीला पैशांचे आमिष दाखवून तसेच धमकी देत तिच्यावर दोन वेळा अत्याचार केल्याच्या आरोपावरून शिरूर पोलिसांनी एका व्यक्तीला अटक केली असून, या प्रकरणी शिरूर पोलिस ठाण्यात पोक्सो कायदा आणि अनुसूचित जाती-जमाती अत्याचार प्रतिबंधक कायद्यान्वये गुन्हा दाखल करण्यात आला आहे.
शिरूर पोलिसांनी दिलेल्या माहितीनुसार, पीडित मुलगी १७ वर्षांची आहे.आरोपी श्रीरंग ठकाजी अनोसे (रा. अनोसेवाडी, ता. शिरूर, जि. पुणे) याने पीडित मुलगी अल्पवयीन असल्याची माहिती असतानाही तिला वडापाव व पैशांचे आमिष दाखवून तसेच धमकी देऊन तिच्यावर दोन वेळा शारीरिक अत्याचार केल्याची फिर्याद शिरूर पोलीस ठाण्यात दाखल करण्यात आली आहे.
पोलिसांनी दिलेल्या माहितीनुसार ही घटना १ फेब्रुवारी २०२६ ते ३० एप्रिल २०२६ या कालावधीत अनोसेवाडी-कळवंतवाडी परिसरात घडल्याचे तक्रारीत नमूद करण्यात आले आहे. घटनेची नेमकी तारीख पीडितेला आठवत नसल्याचे पोलिसांनी सांगितले.
दरम्यान, वैद्यकीय तपासणीदरम्यान पीडित मुलगी सुमारे सात ते आठ महिन्यांची गर्भवती असल्याचे वैद्यकीय अहवालातून समोर आल्याने प्रकरणाचे गांभीर्य वाढले आहे. त्यानंतर पोलिसांनी संबंधित कायद्यांतील विविध कलमांनुसार गुन्हा दाखल केला आहे. या प्रकरणी आरोपीला अटक करण्यात आली असून, पुढील तपास उपविभागीय पोलिस अधिकारी रविंद्र भोसले यांच्या मार्गदर्शनाखाली सुरू आहे.
