अमरावती : अमरावती जिल्ह्यातील भातकुली येथील मातोश्री गौराबाई गुढे अनुदानित आश्रमशाळेतील एका 11 वर्षीय आदिवासी विद्यार्थिनीच्या अचानक छातीत दुखू लागलं आणि तिचा जागीच मृत्यू झाला. प्रिया गणेशराव मावसकर असे मृत मुलीचे नाव असून ती मेळघाटातील राणीगावची रहिवासी होती. या घटनेमुळे आश्रमशाळा परिसरात मोठी खळबळ उडाली आहे.
मिळालेल्या माहितीनुसार, प्रिया ही या आश्रमशाळेत इयत्ता 5 वीत शिक्षण घेत होती. अचानक तिच्या छातीत तीव्र वेदना सुरू झाल्याने तिला तातडीने एका खाजगी रुग्णालयात उपचारासाठी दाखल करण्यात आले. मात्र, डॉक्टरांच्या उपचारादरम्यान तिची प्राणज्योत मालवली.
या घटनेनंतर एका मोठ्या वादाला तोंड फुटले आहे. मुलीच्या मृत्यूनंतर तिचे शवविच्छेदन (पोस्टमाॉर्टम) न करताच घाईघाईने अंत्यसंस्कार उरकण्यात आल्याचा गंभीर आरोप केला जात आहे. कायदेशीर व वैद्यकीय प्रक्रिया पूर्ण न करता अंत्यसंस्कार का पार पडले, असा सवाल आता उपस्थित केला जात असून या प्रकरणात संशयाचे वातावरण निर्माण झाले आहे.
या घटनेचे गांभीर्य ओळखून स्थानिक आदिवासी संघटना चांगल्याच आक्रमक झाल्या आहेत. या दुर्दैवी मृत्यूची तसेच संपूर्ण प्रकरणात आश्रमशाळा प्रशासनाच्या संशयास्पद भूमिकेची निष्पक्ष व सखोल चौकशी करण्यात यावी, अशी जोरदार मागणी आदिवासी संघटनांकडून केली जात आहे
