पुणे : वृंदावन येथील प्रसिद्ध संत प्रेमानंद महाराज यांचे शिष्य दीपक लोधी (ज्यांना ‘रसिक दुलारी’ या नावानेही ओळखले जात होते) यांच्या संशयास्पद मृत्यू प्रकरणात महत्वाची माहिती समोर आली आहे.या संपूर्ण घटनेचा एक CCTV व्हिडिओ पोलिसांच्या हाती लागला आहे. या फुटेजमध्ये आश्रमाखालील रस्त्यावर लोक नेहमीप्रमाणे ये-जा करत असताना अचानक दीपक चौथ्या मजल्यावरून खाली कोसळताना दिसत आहेत.
पोलिसांना दीपक यांच्या मृतदेहाचा पोस्टमार्टम रिपोर्ट मिळाला आहे. या रिपोर्टबाबत माहिती देताना अधिकारी संदीप कुमार यांनी सांगितले की, शरीरातून अतिरिक्त रक्तस्त्राव झाल्यामुळेच त्यांचा मृत्यू झाला आहे. चौथ्या मजल्यावरून खाली पडल्याने त्यांच्या शरीरावर अनेक ठिकाणी गंभीर दुखापती झाल्या होत्या, ज्यामुळे मोठ्या प्रमाणात रक्त वहून गेले. बाराह घाट मार्गावर असलेल्या ‘गुरुकृपा कुंज’ या आश्रमात दीपक वास्तव्य करत होते.आता याप्रकरणी पोलीस अधिकारी संदीप कुमार यांच्या नेतृत्वाखाली सखोल तपास सुरू आहे.
पोलीस तपासादरम्यान दीपक यांच्या खोलीची पाहणी केली असता, तेथे टाइल्स कापण्यासाठी वापरले जाणारे कटर आढळून आले आहे. यावरून पोलिसांनी असा संशय व्यक्त केला आहे की, दीपक यांनी आधी ग्राइंडरने स्वतःला गंभीररीत्या जखमी केले आणि त्यानंतर चौथ्या मजल्यावरून खाली उडी मारली.त्यामुळे अधिक रक्तस्त्राव झाला.
मात्र, हा रक्तस्त्राव पडल्यामुळे झाला की ग्राइंडरने केलेल्या जखमांमुळे, याबाबत वैद्यकीय तज्ज्ञांकडून अधिक स्पष्टता मिळणे बाकी आहे. दीपक यांनी इतके टोकाचे पाऊल का उचलले आणि या घटनेमागे नेमके काय कारण होते, याचा पोलीस सर्व बाजूंनी कसून शोध घेत आहेत. तपास पूर्ण झाल्यानंतरच मृत्यूचे खरे कारण स्पष्ट होईल.
