पुणे : म्हाडाच्या पुणे गृहनिर्माण व क्षेत्रविकास मंडळाच्या १५ टक्के सामाजिक आणि २० टक्के सर्वसमावेशक गृहनिर्माण योजनांतील सदनिकांसाठी ऑनलाइन अर्ज करण्याची मुदत पुन्हा वाढवण्यात आली आहे. अर्ज सादर करण्यासाठी यापूर्वी २२ ऑक्टोबर २०२६ ही अंतिम तारीख निश्चित करण्यात आली होती. मात्र, आता ही मुदत ३० ऑक्टोबर २०२६ रोजी रात्री ११ वाजून ५९ मिनिटांपर्यंत वाढवण्यात आली आहे. अर्जदारांच्या कागदपत्रांची ऑनलाइन पडताळणी करण्यासाठी लागणारा वेळ आणि महाआयटीच्या प्रणालीचे अद्ययावतीकरण या कारणांमुळे हा निर्णय घेण्यात आला आहे. मंडळाचे मुख्याधिकारी राहुल साकोरे यांनी ही माहिती दिली. या मुदतवाढीमुळे अर्जप्रक्रिया पूर्ण न करू शकलेल्या नागरिकांना मोठा दिलासा मिळणार आहे.
या सदनिकांच्या वितरणासाठी २४ ऑगस्ट रोजी जाहिरात प्रसिद्ध करण्यात आली होती. त्याच दिवशी दुपारी १२ वाजल्यापासून ऑनलाइन अर्ज नोंदणी सुरू झाली होती. अर्जदारांना आयएचएलएमएस २.० प्रणालीवर अधिवास प्रमाणपत्र, उत्पन्नाचा दाखला आणि आवश्यक कागदपत्रे अपलोड करावी लागतात. अधिवास प्रमाणपत्र आणि उत्पन्नाच्या दाखल्याची पडताळणी महाआयटीकडून, तर आयकर विवरणाची पडताळणी आयकर विभागाकडून ऑनलाइन पद्धतीने केली जाते. या प्रक्रियेला अपेक्षेपेक्षा अधिक वेळ लागत असल्याने अर्ज सादर करण्याची मुदत यापूर्वीही वाढवण्यात आली होती.
दरम्यान, प्रणालीच्या अद्ययावतीकरणासाठी महाआयटीचे संकेतस्थळ, पोर्टल आणि ॲप २० ऑक्टोबरपर्यंत बंद ठेवण्यात येणार असल्याचे जाहीर करण्यात आले होते. त्यामुळे अनेक अर्जदारांच्या कागदपत्रांची पडताळणी प्रलंबित राहिली. उपलब्ध माहितीनुसार, ४ हजार ९२५ अधिवास प्रमाणपत्रे आणि ८ हजार ५१३ उत्पन्नाचे दाखले पडताळणीच्या प्रतीक्षेत आहेत. या योजनेला नागरिकांकडून चांगला प्रतिसाद मिळाला असून, आतापर्यंत १ लाख ४१ हजार ४१७ अर्जदारांनी अनामत रक्कम भरली आहे. या परिस्थितीचा विचार करून म्हाडाने अर्जासाठी ३० ऑक्टोबरपर्यंत मुदतवाढ दिली आहे. त्यामुळे प्रलंबित कागदपत्रांची पडताळणी पूर्ण करून अर्ज प्रक्रिया पूर्ण करण्यासाठी अर्जदारांना अतिरिक्त वेळ मिळणार आहे.
