पुणे : महाराष्ट्र राज्य सरकारने राज्यातील तब्बल 265 तालुक्यांमध्ये दुष्काळाची स्थिती जाहीर केली असली, तरी प्रत्यक्षात शेतकरी अजूनही सरकारी मदतीपासून वंचित आहेत. पावसाच्या मोठ्या तुटीमुळे शेतकरी आधीच आर्थिक संकटात सापडले आहेत. अशातच राज्याचे जलसंपदा मंत्री राधाकृष्ण विखे-पाटील यांनी केलेल्या एका विधानामुळे दुष्काळग्रस्त शेतकरी आक्रमक झाले आहेत.
अहिल्यानगर जिल्ह्यातील राहाता कृषी उत्पन्न बाजार समितीच्या वार्षिक सर्वसाधारण सभेत बोलताना मंत्री विखे-पाटील यांनी एक वक्तव्य केले, ज्यावर शेतकऱ्यांमधून तीव्र संताप व्यक्त होत आहे.ते म्हणाले, दुष्काळाची परिस्थिती आहे. त्यामुळे डामडौलाने लग्न न करता साध्या पद्धतीने लग्न करा… कोविडमध्ये साधेपणाने लग्न झाले, त्यांना पोर झाली नाहीत का? जो मोठेपणा करता तो यावर्षी तरी थांबवा अशी माझी विनंती… पाऊस कमी आहे… थेट कोविडमध्ये लग्न साधेपणाने झाले त्यांना पोर झाली नाहीत का? असा सवाल राधाकृष्ण विखे पाटील यांनी केला आहे
दुष्काळाचा वाढता रोष पाहून विखे पाटील यांनी आपल्या विधानावर स्पष्टीकरण दिले असले, तरी शेतकरी संघटनांनी यावरून सरकारला धारेवर धरले आहे. आधीच नांदेडमधील बैठकीतील खाद्यपदार्थांवर झालेला खर्च, संभाजीनगरमधील मंत्र्यांचे भव्य स्वागत आणि अकोल्यातील बैठकीदरम्यान अधिकाऱ्यांचा बेजबाबदारपणा यांसारख्या घटनांमुळे प्रशासकीय असंवेदनशीलतेवर प्रश्न निर्माण झाले होते. त्यातच या विधानाने आगीत तेल ओतण्याचे काम केले आहे.
सध्या नुकसानभरपाईचा अंतिम निर्णय प्रलंबित असल्याने प्रत्यक्ष मदत निधी कधी बँकेत जमा होणार, याकडे सर्वांचे लक्ष लागले आहे. संकटसमयी दिलासा देण्याऐवजी नेत्यांकडून होणाऱ्या अशा वक्तव्यांमुळे बळीराजा अधिकच हवालदिल झाला आहे.
