आदित्य बोराटे
इंदापूर : लोकनेते प्रदीपदादा गारटकर मित्र परिवाराच्या वतीने इंदापूर शहरात दहीहंडी उत्सवाचे आयोजन करण्यात आले होते. या उत्सवात महिला आणि पुरुषांसाठी स्वतंत्र दहीहंडी ठेवण्यात आली होती. नागरिकांनी मोठ्या संख्येने उपस्थित राहून गोविंदा पथकांना प्रोत्साहन दिले.
महिला दहीहंडीमध्ये मुंबईतील विलेपार्ले येथील महिला गोविंदा पथकाने सहभाग घेत दहीहंडी फोडली. विजेत्या महिला संघाला १ लाख २१ हजार रुपये आणि मानचिन्ह देऊन गौरविण्यात आले.
पुरुषांच्या दहीहंडीमध्ये व्यंकटेश दहीहंडी संघ, महात्मा फुले दहीहंडी संघ आणि इंद्रेश्वर दहीहंडी संघ सहभागी झाले होते. यामध्ये व्यंकटेश दहीहंडी संघाने दहीहंडी फोडत विजेतेपद मिळवले. विजेत्या संघाला १ लाख ११ हजार रुपये आणि मानचिन्ह देण्यात आले. सहभागी संघांना प्रत्येकी ११ हजार रुपये आणि सन्मानचिन्ह देऊन गौरविण्यात आले.
या कार्यक्रमाला राज्याचे माजी सहकार मंत्री हर्षवर्धन पाटील, मोहोळ तालुक्याचे माजी आमदार यशवंतराव माने, भाजपचे युवा नेते प्रवीण माने, छत्रपती सहकारी साखर कारखान्याचे माजी अध्यक्ष अविनाश घोलप, नीरा-भीमा सहकारी साखर कारखान्याचे उपाध्यक्ष विलास वाघमोडे, पुणे जिल्हा परिषदेचे सदस्य श्रीमंत ढोले, राष्ट्रवादी काँग्रेस अजित पवार गटाचे तालुकाध्यक्ष हनुमंतराव कोकाटे, राष्ट्रवादी काँग्रेस शरदचंद्र पवार पक्षाचे तालुकाध्यक्ष महारुद्र पाटील, कार्याध्यक्ष अमोल भिसे यांच्यासह विविध पक्षांचे पदाधिकारी, संस्थांचे पदाधिकारी, सरपंच, माजी सरपंच आणि नागरिक उपस्थित होते.
महिला व पुरुष गोविंदा पथकांचा सहभाग आणि नागरिकांची उपस्थिती यामुळे दहीहंडी उत्सव पार पडला. सामाजिक एकोपा आणि सांस्कृतिक परंपरा जपण्याच्या उद्देशाने या कार्यक्रमाचे आयोजन करण्यात आल्याचे आयोजकांनी सांगितले.
