मुंबई: मुख्यमंत्री माझी लाडकी बहिण योजना अंतर्गत लाभार्थी महिलांच्या खात्यात जानेवारी महिन्याचा हप्ता जमा होण्यास सुरुवात झाली आहे. महिला व बाल विकास विभागाने सोमवार (23 जानेवारी) पासून रक्कम वर्ग करण्याची प्रक्रिया सुरू केली आहे. सोमवारी रात्रीपासून अनेक महिलांना बँक खात्यात रक्कम जमा झाल्याचे संदेश प्राप्त होत आहेत.
98 कोटींची तरतूद
जानेवारी हप्ता वितरित करण्यासाठी 18 फेब्रुवारी रोजी सामाजिक न्याय विभागाने महिला व बाल कल्याण विकास विभागाकडे 98 कोटी रुपयांचा निधी वर्ग केला होता. निधी प्राप्त झाल्यानंतर हप्त्याच्या वितरणास सुरुवात करण्यात आली.
लाभार्थी संख्येत घट
जानेवारी महिन्यात 14 तारखेच्या सुमारास डिसेंबर 2025 चा हप्ता लाभार्थ्यांच्या खात्यात जमा करण्यात आला होता. त्यावेळी सुमारे 1 कोटी 60 लाख महिलांना लाभ देण्यात आला होता.
योजनेची सुरुवात जुलै 2024 मध्ये झाली तेव्हा लाभार्थी महिलांची संख्या सुमारे 2 कोटी 46 लाख होती. मात्र, राज्य सरकारने ई-केवायसी प्रक्रिया बंधनकारक केल्यानंतर लाभार्थी संख्येत घट झाल्याचे दिसून आले. 31 डिसेंबरपर्यंत ई-केवायसी पूर्ण करण्याचे निर्देश देण्यात आले होते. त्यानुसार 1 कोटी 90 लाख महिलांनी प्रक्रिया पूर्ण केली; त्यापैकी योग्य तपशील सादर करणाऱ्या 1 कोटी 60 लाख महिलांनाच डिसेंबरचा हप्ता मिळाला.
ई-केवायसी दुरुस्तीसाठी मुदत
ई-केवायसी प्रक्रियेदरम्यान चुकीचे पर्याय निवडलेल्या लाभार्थींना 31 मार्च 2026 पर्यंत दुरुस्तीची संधी देण्यात आली आहे. संबंधित महिलांना ही अंतिम मुदत असल्याचे विभागाने स्पष्ट केले आहे.
आतापर्यंत 19 हप्ते
जुलै 2024 ते जानेवारी 2026 या कालावधीत लाभार्थींना एकूण 19 हप्ते वितरित करण्यात आले आहेत. तसेच प्रधानमंत्री किसान सन्मान योजना आणि नमो शेतकरी महासन्मान निधी यांचा लाभ घेणाऱ्या पात्र महिला शेतकऱ्यांना दरमहा 500 रुपयांची मदत दिली जाते.
दरम्यान, हप्ता वितरणाची प्रक्रिया टप्प्याटप्प्याने सुरू असून उर्वरित पात्र महिलांच्या खात्यातही लवकरच रक्कम जमा होणार असल्याचे महिला व बाल विकास विभागाने स्पष्ट केले आहे.
