पुणे: पुण्यातील नारायण पेठ (Pune News) सारख्या भागातून एक धक्कादायक प्रकार समोर आला आहे. सांडपाणीची पाईप लाईन दुरुस्ती करण्याच्या साध्या बहाण्याने एका सेवानिवृत्त अधिकाऱ्याची तब्बल 6 कोटी 70 लाख रुपयांची फसवणूक करण्यात आली आहे. गेल्या दोन वर्षांपासून चाललेला हा ‘ब्लॅकमेलिंग’चा खेळ अखेर पोलिसांच्या कारवाईमुळे उघड झाला असून, विश्रामबाग पोलिसांनी मुख्य आरोपीला बेड्या ठोकल्या आहेत.
संदीप उर्फ सोनू चव्हाण या आरोपीने स्वतःला महानगरपालिकेचा कंत्राटदार असल्याचे भासवले. “तुमच्या घराजवळील ड्रेनेज लाईनमध्ये झाडांची मुळे शिरली आहेत, त्यामुळे संपूर्ण लाईन बदलावी लागेल,” असे त्याने सांगितले. महापालिकेची परवानगी, चलन भरणे आणि यंत्रसामग्रीचा खर्च अशा तांत्रिक गोष्टी सांगून त्याने सुरुवातीला पैसे उकळण्यास सुरुवात केली. एकदा पैसे मिळाल्यावर आरोपीने धमकावण्याचे सत्र सुरू केले.
आरोपीने कधी स्वतःच्या मुलाच्या शस्त्रक्रियेचे खोटे कारण दिले, तर कधी फोन करून दबाव टाकला. दोन वर्षे हा ज्येष्ठ नागरिक दहशतीखाली सगळं काही सहन करत होते. घरात साठवलेली पुंजी आणि आयुष्यभराची कमाई गुन्हेगारांनी लंपास केली.
दरम्यान, विश्रामबाग पोलिसांनी संदीप चव्हाणला कोथरूडमधून अटक केली असून, त्याला २८ फेब्रुवारीपर्यंत पोलीस कोठडी सुनावण्यात आली आहे. या प्रकरणात त्याच्यासोबत इतर चार जणांचाही सहभाग असून, ही एक मोठी टोळी असण्याची शक्यता पोलिसांनी व्यक्त केली आहे.
