Crime News: ठाणे : ठाणे जिल्ह्यातील मीरा-भाईंदर येथे सुरू असलेल्या पोलीस भरती (Police Bharati) प्रक्रियेदरम्यान एक धक्कादायक प्रकार समोर आला आहे. पोलीस दलात भरती होऊन खाकी वर्दी मिळवण्याचे स्वप्न पाहणाऱ्या एका तरुणाला चुकीचा मार्ग अवलंबल्यामुळे अटक करण्यात आली आहे. शारीरिक चाचणीपूर्वी शरीरात उत्तेजक द्रव्य इंजेक्शनद्वारे घेण्याचा प्रयत्न करत असताना पोलिसांनी त्याला रंगेहात पकडले. या घटनेमुळे भरतीसाठी आलेल्या इतर उमेदवारांमध्ये खळबळ उडाली आहे.
मीरा-भाईंदरमधील नेताजी सुभाषचंद्र बोस मैदानावर सध्या पोलीस भरती प्रक्रिया सुरू आहे. येथे उमेदवारांची शारीरिक चाचणी घेण्यात येत आहे. भरती प्रक्रिया पारदर्शक आणि निष्पक्ष राहावी तसेच कोणताही गैरप्रकार होऊ नये यासाठी अमली पदार्थ विरोधी पथकाचे अधिकारी साध्या वेशात मैदान परिसरात गस्त घालत होते. याच वेळी एका तरुणाच्या हालचाली संशयास्पद वाटल्याने पोलिसांनी त्याच्यावर लक्ष ठेवले.
तपासादरम्यान हा तरुण स्वतःच्या शरीरात इंजेक्शनद्वारे उत्तेजक द्रव्य टोचण्याचा प्रयत्न करत असल्याचे दिसून आले. पोलिसांनी तातडीने कारवाई करत त्याला ताब्यात घेतले. अटक करण्यात आलेल्या तरुणाचे नाव साहिल शंकर अजवेके असून त्याचे वय 23 वर्ष आहे. तो पुणे जिल्ह्यातील बारामती येथील रहिवासी आहे. धावण्याच्या चाचणीत चांगली कामगिरी करता यावी आणि शारीरिक क्षमता वाढावी या उद्देशाने त्याने हे कृत्य केल्याचे प्राथमिक तपासात समोर आले आहे.
या प्रकरणी मीरा-भाईंदर पोलिसांनी आरोपीविरुद्ध गुन्हा दाखल केला असून पुढील तपास सुरू आहे. पोलीस भरतीसारख्या महत्त्वाच्या प्रक्रियेत गैरप्रकार करण्याचा प्रयत्न केल्यामुळे संबंधित तरुणाचे पोलीस होण्याचे स्वप्न धुळीस मिळाले आहे. या घटनेमुळे भरती प्रक्रियेत नियमांचे काटेकोर पालन किती महत्त्वाचे आहे, याची पुन्हा एकदा जाणीव झाली आहे.
