नागपूर : गेल्या काही दिवसांपासून नागपूर शहरात कुत्र्यांनी कहर केला आहे. अशातच आता शहरातील वाडी परिसरातील दत्तवाडी भागात एका ६ वर्षांच्या मुलावर भटक्या कुत्र्यांनी प्राणघातक हल्ला केल्याची संतापजनक घटना घडली आहे. या घटनेमुळे परिसरात भीतीचे आणि संतापाचे वातावरण निर्माण झाले आहे.
याबाबत अधिक माहिती अशी की, स्वरूप विजय मेश्राम असे गंभीर जखमी झालेल्या मुलाचे नाव असून, तो घराबाहेर खेळत असताना अचानक तीन भटक्या कुत्र्यांनी त्याच्यावर हल्ला चढवला. हल्ला झाल्यानंतर घटनास्थळी उपस्थित असलेल्या स्थानिक नागरिकांनी कुत्र्यांना हाकलवून लावले. त्यानंतर स्वरूपला जवळच्या रुग्णालयात दाखल करण्यात आले.प्रत्यक्षदर्शींनी दिलेल्या माहितीनुसार, कुत्र्यांनी स्वरूपला जबरदस्त ओरबडले आणि त्याच्या मानेवर खोल जखमा केल्या आहेत. या हल्ल्यात स्वरूप गंभीररित्या जखमी झाला आहे.ही घटना वाडी पोलीस ठाण्याच्या हद्दीतील सुरक्षा नगर भागात एपी फिटनेस जीमसमोर घडली आहे.दरम्यान प्राथमिक उपचारानंतर, त्याच्या गंभीर प्रकृतीची जाणीव डॉक्टरांना झाल्यानंतर त्याला शहरातील मोठ्या रुग्णालयात हलवण्यात आले.
दरम्यान कुत्र्यांनी मानेवर केलेल्या खोल जखमेमुळे त्याच्या स्नायूंना व नसाला गंभीर इजा झाली आहे, ज्याचा परिणाम मेंदूपर्यंत होण्याची शक्यता आहे. सध्या त्याच्यावर अतिदक्षता विभागात उपचार सुरू आहेत.
