सांगली: भारतीय महिला क्रिकेट संघाची स्टार खेळाडू स्मृती मानधना (Smriti Maandhana) हिच्या नियोजित विवाह सोहळ्यावर अचानक संकट कोसळले आहे. आज (23 नोव्हेंबर) सांगली येथे संगीतकार पलाश मुच्छल (Music composer Palash Muchhal) यांच्याशी स्मृतीचा विवाह संपन्न होणार होता. मात्र, विवाहाच्या काही तास आधीच स्मृतीचे वडील श्रीनिवास मानधना यांना हृदयविकाराचा झटका आल्याची माहिती समोर आली आहे.
मिळालेल्या माहितीनुसार, श्रीनिवास मानधना यांना तातडीने सांगली येथील एका खासगी रुग्णालयात दाखल करण्यात आले आहे. डॉक्टरांनी तपासणीनंतर त्यांची प्रकृती सध्या स्थिर असल्याचे सांगितले आहे.
विवाह सोहळा अनिश्चित काळासाठी स्थगित
वडिलांना हृदयविकाराचा झटका आल्याच्या या गंभीर घटनेमुळे स्मृती मानधनाने मोठा निर्णय घेतला आहे. वडिलांच्या प्रकृतीच्या कारणास्तव तिने आजचा विवाह सोहळा अनिश्चित काळासाठी स्थगित करण्याचा निर्णय घेतला आहे.
“वडील पूर्णपणे बरे होईपर्यंत विवाह न करण्याचा स्मृतीने निर्णय घेतला आहे,” अशी माहिती समोर येत आहे. सध्या श्रीनिवास मानधना यांच्यावर रुग्णालयात डॉक्टरांच्या देखरेखीखाली उपचार सुरू आहेत.
