सोलापूर : मोहोळ येथे झालेल्या राज्य निमंत्रित खो खो स्पर्धेत पुरुष गटात नवमहाराष्ट्र संघ पुणे तर महिला गटात विरुद्ध छत्रपती व्यायाम प्रसारक मंडळ उस्मानाबाद या संघाने विजेतेपद पटकाविले. आदित्य गणपुले व संपदा मोरे हे सर्वोत्कृष्ट अष्टपैलू खेळाडूंचे मानकरी ठरले.
मोहोळ येथील नागनाथ विद्यालयाच्या मैदानावर झालेल्या या स्पर्धेत महिलांच्या अंतिम सामन्यात उस्मानाबादने ठाणेच्या रा.फ. नाईक संघास ११-८ असे ३ गुणांनी पराभूत केले. मध्यंतरापर्यंत ठाणेच्या शीतल भोर (२.००, १.१०मि. व २ गुण), व गीतांजली नरसाळे (२.१०, १.३०मि.) यांनी शानदार खेळ करीत उस्मानाबादला बरोबरीत रोखले होते.
नंतर मात्र, उस्मानाबादच्या संपदा मोरे (२.२०, २.३०मि. व ४ गुण) व अश्विनी शिंदे (३.००, ३.४०मि.) यांनी बहारदार खेळी करीत संघाचा विजय खेचून आणला. अश्विनी, पूजा फरगडे व संपदा हे अनुक्रमे संरक्षक, आक्रमक व अष्टपैलू पुरस्काराचे मानकरी ठरले. तृतीय व चतुर्थ स्थान अनुक्रमे राजमाता जिजाऊ संघ पुणे व संस्कृती संघ नाशिक यांनी मिळविले.
पुरुष गटात पुणेच्या नवमहाराष्ट्र संघाने शिरसेकर महात्मा गांधी स्पोर्ट्स अकादमी मुंबई उपनगरवर १४-१३ असा पराभव केला. पुण्याने मध्यंतरासच ९-६ अशी निर्णायक आघाडी घेतली होती. ती आघाडीच त्यांना विजय मिळवून दिली. आदित्य गणपुले (२.००, १.००मि. व ३ गुण) व प्रतिक वाईरकर (२.००, १.००मि. व २ गुण) हे त्यांच्या विजयाचे शिल्पकार ठरले. मुंबई उपनगरच्या अनिकेत पोटे (२.१०, १.२० मि. व ३ गुण) व ऋषिकेश मुर्चावडे (२.००मि. व ४ गुण) यांचे प्रयत्न अपुरे पडले.
प्रतिक, ऋषिकेश व आदित्य हे अनुक्रमे संरक्षक, आक्रमक व अष्टपैलू पुरस्काराचे मानकरी ठरले. तृतीय व चतुर्थ स्थान अनुक्रमे विहंग क्रीडा मंडळ ठाणे व रणाप्रताप तरुण मंडळ कुपवाड सांगली यांनी मिळविले.
पारितोषिक वितरण आमदार यशवंत माने, माजी आमदार राजन पाटील यांच्या हस्ते करण्यात आले. प्रथम, द्वितीय व तृतीय संघास अनुक्रमे ५१, ३१ व २१ हजार रुपयाचे रोख पारितोषिक व करंडक देण्यात आले.
