Border-Gavaskar trophy: टीम इंडिया विरुद्ध आता ऑस्ट्रेलिया दौऱ्यावर आहे. टीम इंडिया आणि ऑस्ट्रेलिया यांच्यामध्ये बॉर्डर गावसकर ट्रॉफीला 22 नोव्हेंबरपासून सुरुवात होणार आहे. या मालिकेतील पहिला सामना हा पर्थ येथे खेळवण्यात येणार असून टीम इंडियाने या सामन्यासाठी जोरदार तयारी केली आहे. सर्व क्रिकेट चाहत्यांना पहिल्या सामन्याची प्रतिक्षा लागून राहिली आहे. अशात टीम इंडियाचा अनुभवी फलंदाज आणि माजी कर्णधार विराट कोहली याने सोशल मीडियावर पोस्ट केली आहे. विराटची ही पोस्ट सद्या तुफान व्हायरल झाली आहे. विराटच्या या पोस्टवर अनेक चाहत्यांनी कमेंट्स केल्या आहेत. तसेच या पोस्टबाबत अनेक तर्क वितर्क काढले जात जात आहे.
विराट कोहलीच्या पोस्टमुळे उडाली खळबळ..
विराटने बॉर्डर गावसकर ट्रॉफीआधी ब्रँड प्रमोशन संदर्भात ही पोस्ट केली आहे. परंतु, या पोस्टबाबत क्रिकेट चाहत्यांनी गैरसमज करुन घेतला आहे. विराट कसोटी क्रिकेटमधून निवृत्त घेत आहे. असा अर्थ क्रिकेट चाहत्यांनी या पोस्टमधून काढला आहे. तर काही चाहत्यांनी तर कहरच केला. विराट आणि त्याची पत्नी अनुष्का शर्मा हे दोघे विभक्त होत असल्याचाही अर्थ या पोस्टमधून काढण्यात आला आहे. विराटने कसोटी कर्णधारपद सोडताना व्हाईट बॅकग्राउंडवर टेक्सट शेअर करत सोशल मीडियावर पोस्ट केली होती. तर आताही त्याच प्रकारे पोस्ट केली आहे. त्यामुळे चाहत्यांमध्ये संभ्रम निर्माण झाला आहे.
कोहलीच्या पोस्टमध्ये नेमकं काय?
“जेव्हा आपण मागे वळून पाहतो तेव्हा लक्षात येतं की आपण दुसऱ्यांपेक्षा वेगळे ठरलो. आपण कधीच त्या गटात एकरुप झालो नाहीत, ज्यात आपल्याला एकरुप करण्याचा प्रयत्न करण्यात आला. दोघेही एकमेकांबाबत फक्त आकर्षित झाले. वेळेनुसार आपण बदललो. मात्र नेहमीच आपल्या पद्धतीने काम केलं. काहींनी आम्हाला वेडं समजलं. तर काहींना काही समजलंच नाही. मात्र प्रामाणिकपणे सांगायचं झालं तर आम्ही याची पर्वा केली नाही”, असं विराटने या पोस्टमध्ये म्हटलं.
“दहा वर्षांमधील चढ-उतार आणि कोरोना महामारीतही आम्हाला डगमगलो नाहीत. आम्हाला जर कुणामुळे वेगळ पाडलं गेल्याचं जाणवलं तर ते ताकदीमुळे. इथे 10 वर्ष आपल्या पद्धतीने काम करण्यासाठी The Wrogn Way. तर पुढील 10 वर्षांपर्यंत योग्य पुरुषांसाठी Wrogn.”, असंही विराटने नमूद केलंय.
— Virat Kohli (@imVkohli) November 20, 2024
कोहलीच्या पोस्टवरील चाहत्यांच्या वेगवेगळ्या कमेंट्स..
विराटच्या चाहत्यांनी घाई घाईत त्याची पोस्ट पूर्ण न वाचताच कमेंट करायला सुरुवात केली. “बॉर्डर गावसकर ट्रॉफीआधी संन्यास”, असं एका चाहत्याने कमेंट म्हटलं आहे. “छोटा हार्टअटॅक”, असं एकाने म्हटलं आहे. “अशा प्रकारे तर चाहते तुमच्या खऱ्याखुऱ्या निवृत्तीबाबतच्या पोस्टलाही प्रमोशनल पोस्ट समजतील, तुमच्या मॅनेजर/फॉन्ट, बॅकग्राउंड बदला”, असंही एका चाहत्याने कमेंट करून म्हटलं आहे.
