पुणे : चंदननगरच्या चौकात भरदिवसा प्रेमिकेची चाकूने सपासप वार करत हत्या करुन स्वतः विष घेऊन आत्महत्या करण्याचा प्रयत्न करणाऱ्या आरोपीचा जामीन मुंबई उच्च न्यायालयाने मंजूर केला आहे. किरण अशोक शिंदे असे जामीन झालेल्या आरोपीचे नाव आहे.
मिळालेल्या माहितीनुसार, आरोपी किरण शिंदे याच्या मैत्रिणीचे मित्राबरोबर प्रेमसंबंध चालू असल्याच्या संशयावरून ११ जून २०१९ ला किरण याने चाकूने वार करुन मैत्रिणीची चंदननगर येथील चौकात हत्या केली होती. त्यावेळी चौकात जमलेल्या लोकांच्या समोर चाकूने वार करून आरोपी त्या ठिकाणांवरून पळून गेला होता. त्यानंतर चंदननगर चौकात ट्रॅफिकच्या ड्युटीवर असलेल्या पोलिसांनी या महिलेस वैद्यकीय उपचारांसाठी रुग्णालयात दाखल केले होते. परंतु, उपचारादरम्यान तरुणीचा मृत्यू झाला होता.
या घटनेनंतर आरोपी किरण शिंदे याने स्वतः विष पिऊन आत्महत्या करण्याचा प्रयत्न केला होता. तपासादरम्यान पोलिसांनी आरोपीस अटक होती. तेव्हापासून आरोपी येरवडा कारागृहात बंदिस्त होता. कारागृहात असताना आरोपीने ॲड. नितीन भालेराव व ॲड अमित ईचम यांच्याद्वारे उच्च न्यायालयात जामीनाचा अर्ज दाखल केला होता. त्यानंतर आरोपीस २० जून २०१९ रोजी अटक केली होती.
दरम्यान, आरोपी याची केस सेशन्स कोर्टात चार्ज झाली. परंतु सदर न्यायप्रक्रियेत विलंब होत असून, १८ पैकी सरकारपक्षातर्फे केवळ ६ च साक्षीदार मागील २ वर्षात तपासण्यात आले. एकूण साक्षीदार तपासण्यास विलंब होणार असल्याचे आरोपी पक्षातर्फे सांगण्यात आले. त्यावेळी आरोपी व सरकार पक्षाचा युक्तिवाद ऐकून आरोपीस जामिनावर सोडण्याचे आदेश न्यायाधीश माधव जामदार यांच्या खंडपीठाने दिल्याची माहिती आरोपीचे वकील ॲड. नितीन भालेराव यांनी दिली.
