पुणे (Pune) : वाहतुकीच्या नियमांचे उल्लंघन करून दुचाकी भरधाव वेगात चालवणाऱ्या तरुणाचा पुलाच्या मध्यभागी असणाऱ्या कठड्याजवळील सिमेंटच्या ब्लॉकला धडकून जागीच मृत्यू झाला. ही घटना बुधवारी (ता. १५) रात्री बारा वाजण्याच्या सुमारास वडगाव पुलावर घडली.
याबाबत मिळालेल्या अधिक माहितीनुसार, तुळशीराम कोकया राठोड (वय ३६, रा. डहाणूकर कॉलनी) असे अपघातात मृत्यूमुखी पडलेल्या तरुणाचे नाव आहे. या प्रकरणी पोलीस अंमलदार सुनील चव्हाण (वय ३०) यांनी सिंहगड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, या अपघातात मृत्यूमुखी पडलेला तुळशीराम राठोड हा वाहतुकीच्या नियमांचे उल्लंघन करून दुचाकी भरधाव वेगाने चालवत होता. वडगाव पुलावर मध्यभागी असणाऱ्या कठड्याजवळील सिमेंट ब्लॉकला धडकून तो गंभीर जखमी झाला. या घटनेचा अधिक तपास पोलीस उपनिरीक्षक शिवाजी बुणगे करत आहेत.
