पिंपरी: ओव्हरटेक करत असताना दुचाकीला धडक लागल्याने गंभीर जखमी होऊन दुचाकी चालकाचा मृत्यू झाला. ही घटना शुक्रवारी (दि. २१) रात्री सव्वा अकरा वाजताच्या सुमारास चांदणी चौक ते भूगाव रोडवर घडली. दरम्यान संतप्त जमावाने ट्रक पेटवून दिला असून या प्रकरणी शनिवारी (दि.२२) हिंजवडी पोलीस ठाण्यात गुन्हा दाखल करण्यात आला. गणेश शंकर शेडगे (वय २२) असे मृत्यू झालेल्या दुचाकी चालकाचे नाव आहे. याप्रकरणी शिवाजी तानाजी शेडगे (वय ३९, रा. भुगाव, ता. मुळशी) यांनी हिंजवडी पोलीस ठाण्यात फिर्याद दिली आहे. त्यानुसार ट्रक चालक विशाल छबन पवळे (वय ३२, रा. पिरंगुट, ता. मुळशी) याच्या विरोधात गुन्हा दाखल करण्यात आला आहे. तर ट्रक पेटवल्याप्रकरणी मयूर सतीश भरेकर, सुरज अनिकांत भरेकर, सचिन शेडगे, शंकर शेडगे, समीर शेडगे, मयूर भालेकर, सुरज भालेकर व इतर ८ ते १० जणांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी विशाल याने त्याच्या ताब्यातील ट्रक (एमएच १२/व्हीटी ७७३२) भरधाव आणि वाहतुकीच्या नियमांकडे दुर्लक्ष करून चालवला. गणेश शेडगे हे त्यांच्या दुचाकीवरून जात असताना त्या दुचाकीला विशाल याने ओव्हरटेक करण्याचा प्रयत्न केला. ओव्हरटेक करत असताना ट्रकची दुचाकीला धडक दिली. यामध्ये गणेश यांचा मृत्यू झाला. अपघात झाल्यानंतर विशाल ट्रक सोडून घटनास्थळावरून पळून गेला. दरम्यान अपघात झाल्यानंतर घटनास्थळी गर्दी झाली. संतप्त जमावाने ट्रक पेटवून दिला.
