पुणे : पुण्यातील खराडी परिसरातून एक धक्कादायक घटना समोर येत आहे. तरुणीला पिस्तुलाचा धाक दाखवून तिला जबरदस्तीने कारमधून पळवून नेले. तिच्यासोबत लग्न करुन शारीरिक संबंध प्रस्थापित केले. एवढंच नाही तर तिला जातीवाचक शिवीगाळ केल्याची घटना घडली आहे. ही घटना गुरुवारी १५ फेब्रुवारी ला सकाळी साडेआठ ते शुक्रवारी १६ फेब्रुवारीला सकाळी साडेआठच्या दरम्यान खराडी येथील झेन्सार चौकातील बस स्टॉप आणि दस्तुरवाडी गावच्या हद्दीत घडली. याप्रकरणी २२ वर्षीय तरुणीने चंदननगर पोलिस ठाण्यात फिर्याद दिली आहे.
यावरून महेंद्र सीताराम वेताळ (रा. भावडी ता. हवेली) आणि अमोल जाधव (रा. लोणीकंद ता. हवेली) यांच्यावर बलात्कारासह आर्म अॅक्ट आणि अॅट्रोसीटी अॅक्टनुसार गुन्हा दाखल केला आहे. महेंद्र वेताळ याला शुक्रवारी रात्री बाराच्या सुमारास पोलिसांनी अटक असून दुसऱ्याचा शोध सुरु आहे. हा गुन्हा लोणीकंद पोलिसांकडून चंदननगर पोलिसांकडे वर्ग करण्यात आला आहे
पोलिसांनी दिलेल्या अधिक माहितीनुसार, फिर्यादी गुरुवारी सकाळी खराडी येथील झेन्सार चौकातील बस स्टॉप येथे जात असताना अचानक एक चारचाकी (एमएच १२ व्हीएफ २६४८) तिच्याजवळ येऊन थांबली. आरोपींनी तरुणीला जबरदस्तीने कारमध्ये बसवून पिस्तुलाचा आणि कोयत्याचा धाक दाखवला. तिचे अपहरण करुन आरोपी महेंद्र वेताळ याने तिच्यासोबत जबरदस्तीने लग्न करुन लग्नाचे फोटो सोशल मीडियावर व्हायरल केले.
यानंतर नाशिक रोडने दस्तुरवाडी गावच्या हद्दीतील एका डोंगरावर नेऊन पीडितेशी जबरदस्तीने शारीरिक संबंध ठेवले. तसेच तिला जातीवाचक शिवीगाळ करुन दुसऱ्या दिवशी तुळापुर फाटा येथे आणून सोडून देऊन आरोपी पळून गेले. यानंतर तरुणीने लोणीकंद पोलिस ठाण्यात धाव घेत आरोपींविरोधात फिर्याद दिली. याप्रकरणाचा पुढील तपास येरवडा विभागाचे सहायक पोलिस आयुक्त संजय पाटील करत आहेत.
