पुणे : प्रेमात अडसर ठरणाऱ्या पतीला पत्नीने प्रियकराच्या मदतीने सुरीने पोटावर आणि गळ्यावर वार करून जीवे ठार मारण्याचा प्रयत्न केल्याचा प्रकार घडला आहे. महाळुंगे एमआयडीसी पोलिस ठाण्याच्या हद्दीत सोमवारी (ता. 17) रात्री साडेबारा वाजण्याच्या सुमारास हि घटना घडली आहे. याप्रकरणी पत्नी आणि तिच्या प्रियकरावर महाळुंगे एमआयडीसी पोलिस ठाण्यात गुन्हा दाखल करून अटक करण्यात आले आहे.
सचिनकुमार उपेंद्र राजभर (वय 23, मूळगाव जतपुरा, थाना राजपूर, जि. बक्सर) याच्यासह एका महिलेवर गुन्हा दाखल करुन अटक करण्यात आलेल्या दोघाची नावे आहेत. याप्रकरणी पती अजयकुमार सिंग (वय.२८, सध्या रा. सावरदरी, ता. खेड) याने महाळुंगे एमआयडीसी पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, महाळुंगे एमआयडीसी पोलिस ठाण्याच्या हद्दीतील सावरदरी (ता. खेड) येथे औद्योगिक वसाहतमध्ये फिर्यादी अजय कुमार सिंग व आरोपी पत्नी हे दोघेजण राहतात. अजय कुमार सिंग यांची पत्नी व आरोपी सचिन कुमार राजभर यांचे प्रेमप्रकरण होते. त्यामुळे प्रेमात अडसर ठरणाऱ्या पतीला सोमवारी रात्री साडेबारा वाजण्याच्या सुमारास दोघांनी मिळून संगनमत करत मारण्याचे ठरविले.
दरम्यान, अजय सिंग यास जिवे मारण्याच्या उद्देशाने दोघांनी हाताने मारहाण करत लाटण्याने डोक्यात मारून गंभीर जखमी केले. ’तुमको जानसे मार दूंगी” असे बोलून, पत्नीने फिर्यादी पती अजयकुमार सिंग याच्यावर प्रियकराच्या मदतीने सुरीने पोटावर आणि गळ्यावर वार करून जीवे ठार मारण्याचा प्रयत्न केल्याचे फिर्यादीत नमूद केले आहे. तपास महाळुंगे एमआयडीसी पोलिस करीत आहेत.
