पुणे : राज्याचे उपमुख्यमंत्री अजित पवार सतत या ना त्या कारणांनी चर्चेत असतात. नुकतेच त्यांनी शिरूर मतदारसंघाचे खासदार अमोल कोल्हे यांना ओपन चॅलेंज दिल्यानंतर राजकीय वर्तुळात चर्चा सुरू झालेली असतानाच आता एका वेगळ्याच कारणामुळे अजितदादा चर्चेत आले आहेत. आज भल्या सकाळी अजितदादा हडपसर विधानसभा मतदारसंघातील मांजरी बुद्रुक येथील महाराष्ट्र जीवन प्राधिकरणाच्या मांजरी नळ पाणी पुरवठा प्रकल्पाची पाहणी करण्यासाठी आले होते. गाडीमधून उतरताच आमदार चेतन तुपे आणि जिल्हाधिकारी राजेश देशमुख यांच्यासोबत चर्चा करीत प्रकल्पाच्या ठिकाणी जात असताना अजित पवार यांच्याजवळ थांबलेल्या प्रसारमाध्यमांच्या प्रतिनिधीचा कॅमेरा काही समजण्याच्या आत त्यांच्या डोक्याला लागला. अचानक घडलेल्या या प्रकारामुळे अजित पवार यांनी डोक्याला हात लावला, अन् कॅमेरामनकडे पाहत निघून गेले. मात्र, आज दिवसभर या घटनेची चर्चा राजकीय वर्तुळात रंगली.
पुणे महानगरपालिकेचे आयुक्त विक्रम कुमार, महानगरपालिकेचे अतिरिक्त आयुक्त विकास ढाकणे, सार्वजनिक बांधकाम विभागाचे अधीक्षक अभियंता बाप्पा बहीर, महाराष्ट्र जीवन प्राधिकरणाचे मुख्य अभियंता राजेंद्र रहाणे, अधीक्षक अभियंता वैशाली आवटे, डॉ. भगवान पवार आदी या वेळी उपस्थित होते.
अजित पवार यांच्या अधिकाऱ्यांना सूचना
मांजरी बुद्रुक परिसरातील पाण्याची समस्या लक्षात घेता मांजरी नळ पाणी पुरवठा योजना महाराष्ट्र जीवन प्राधिकरणाने पुणे महानगरपालिकेकडे हस्तांतरित करावी. योजनेअंतर्गत पाणी पुरवठ्याची कामे पूर्ण झालेल्या ठिकाणी महानगरपालिकेने तत्काळ नळ जोडणीची कार्यवाही सुरू करावी. आगामी काळातील लोकसंख्या विचारात घेता रेल्वे क्रॉसिंगच्या बाजूला एक अतिरिक्त पाईपलाईन करावी. महानगरपालिकेने या योजनेची उर्वरीत कामे लवकरात लवकर पूर्ण करुन या भागातील नागरिकांची पाण्याची समस्या सोडवावी, अशा सूचना देखील उपमुख्यमंत्री अजित पवार यांनी अधिकाऱ्यांना दिल्या.
