पुणे : पुण्यातील खराडी परिसरात बाप लेकीच्या नात्याला काळिमा फासणारी घटना उघडकीस आली आहे. बापाने स्वतःच्या अल्पवयीन मुलीसमोर अंगावरील कपडे काढून अश्लील हातवारे करुन स्त्री मनास लज्जा उत्पन्न होईल असे कृत्य केल्याची घटना घडली आहे. तसेच मुलीला क्रूर वागणूक दिल्याचा धक्कादायक प्रकार समोर आला आहे.
आरोपी बापाच्या या वागणुकीमुळे तिच्या मनावार विपरीत परिणाम झाला आहे. हा प्रकार खराडी परिसरात मागील चार वर्षापासून पीडित मुलीच्या घरात घडला. याप्रकरणी पीडित मुलीच्या आईने चंदननगर पोलीस ठाण्यात फिर्याद दिली आहे. त्यावरून 36 वर्षीय नराधम बापावर गुन्हा दाखल करण्यात आला आहे.
याबाबत अधिक माहिती अशी की, आरोपी हा फिर्यादी यांचा पती असून मुलीसह ते सर्वजण एकत्र राहतात. आरोपी बाप हा घरात त्याची नऊ वर्षाची अल्पवयीन मुलगी असतानाही तिच्या समोर अंगावरील कपडे काढून नग्न अवस्थेत फिरत होता. यामुळे मुलीच्या स्त्री मनास लज्जा उत्पन्न होऊन तिच्या मनावर विपरीत परीणाम झाला.
तसेच तिच्या अंगाला अश्लील स्पर्श, अश्लील हातवारे करुन विनयभंग करुन हाताने मारहाण केली. एवढंच नाही तर तिच्या पायाला चटके देवून तिला क्रूर वागणूक दिल्याचे फिर्यादीत म्हटले आहे. याप्रकरणी पीडित मुलीच्या आईने पोलीस ठाण्यात धाव घेत तक्रार दाकःल केली असून पोलिसांनी गुन्हा दाखल केला आहे. पुढील तपास पोलीस उपनिरीक्षक शेगर करत आहेत.
