उरुळी कांचन, (पुणे) : पुणे-सोलापूर महामार्गावरील खेडेकर मळा परिसरात असलेल्या सान्वी मिसळ या हॉटेलच्या समोर दोन दुचाकींचा अपघात झाला. शुक्रवारी (ता. १५) सायंकाळी पाऊणे आठ वाजण्याच्या सुमारास हा अपघात झाला. या अपघातात दोघेजण गंभीर जखमी झाले असून, त्यांना उरुळी कांचन येथील सिद्धिविनायक रुग्णालयात दाखल करण्यात आले.
सार्थक इंगळे व फैजल यादव (रा. दोघेही, कडेठाण, ता. दौंड) असे अपघातात जखमी झालेल्या दोघांची नावे आहेत. मिळालेल्या माहितीनुसार, सार्थक इंगळे व फैजल यादव हे दोघेजण उरुळी कांचनवरून यवतकडे दुचाकीवर निघाले होते. यावेळी गाडीचा अतिवेग असल्याने समोर जाणाऱ्या दुचाकीला पाठीमागून धडक दिली.
दरम्यान, दोघानांही लाईफ केअर या रुग्णवाहिकेतून चालक किरण कदम व तेथील नागरिकांच्या मदतीने उरुळी कांचन येथील सिद्धिविनायक रुग्णालयात दाखल करण्यात आले असून, त्यांच्यावर उपचार सुरु आहेत.
