उरुळी कांचन, (पुणे) : पुणे – सोलापूर महामार्गावर सहजपूर फाटा परिसरात ट्रक व टेम्पोचा अपघात झाला आहे. या अपघातात टेम्पोतील 5 ते 6 जण जखमी झाले असून त्यांना उरुळी कांचन येथील झेडप्लस रुग्णालयात दाखल करण्यात आले आहे. शनिवारी (ता. 09) सायंकाळी साडेसहा वाजण्याच्या सुमारास ही घटना घडली आहे.
मिळालेल्या माहितीनुसार, सदरचा टेम्पो व ट्रक हे सोलापूरच्या बाजूने निघाले होते. सहजपूर फाटा परिसरात आले असता अचानकपणे दोन्ही वाहने महामार्गावरून खाली उतरली आणि अपघात झाला. या अपघातात पिकअप टेम्पोतील 5 ते 6 जण गंभीर जखमी झाले आहेत.
दरम्यान, हा अपघात कसा झाला याबाबत अद्याप माहिती मिळू शकली नसून जखमींना उरुळी कांचन येथील कस्तुरी रुग्णवाहिकेतून बापू झोंबाडे व माऊली लाड यांनी तात्काळ रुग्णालयात दाखल केले आहे. सोलापूरकडे जाणाऱ्या बाजूकडे मोठी गर्दी झाली असून घटनास्थळी पोलीस दाखल झाले आहेत, अशी माहिती मिळत आहे.
