राहुलकुमार अवचट
यवत : घरासमोर बेकायदा गर्दी जमवून सिटी सर्वे जागेत पत्र्याचे शेड का उभारले, रस्ता बंद का केला, असे प्रश्न उपस्थित करत, कानगाव येथे जागेच्या वादावरून तिघांना बेदम मारहाण केल्याप्रकरणी ७ जणांवर यवत पोलीस स्टेशन येथे गुन्हा दाखल करण्यात आला आहे.
याबाबत मिळालेल्या अधिक माहितीनुसार, १० डिसेंबर रोजी दुपारी १.३० च्या सुमारास कानगाव गावच्या हद्दीत राहत असणाऱ्या शेख कुटुंबीयांवर, घरासमोर बेकायदा गर्दी जमवून सिटी सर्वेच्या जागेत पत्र्याचे शेड का उभारले, रस्ता बंद का केला, असा प्रश्न उपस्थित करत, फिर्यादीचे सासरे राज मोहम्मंद शेख, पती ख्वाजा शेख यांना शिवीगाळ, दमदाटी करुन लाथा-बुक्क्यांनी मारहाण करण्यात आली. तर जावेद शेख याने परविन शेख यांच्या हातावर, छातीवर ओरखडले तर पती ख्वाजा यांना दगड मारून दुखापत केल्याची फिर्याद परविन ख्वाजा शेख यांनी यवत पोलीस स्टेशन येथे दिली आहे.
या फिर्यादीवरून हमजद अब्दुल शेख, जावेद नुरमोहम्मंद शेख, नुरमोहम्मंद गफुर शेख, आयशा हमजद शेख, अब्दुल सिंकदर शेख, आवाब आमिन शेख, सुमया जावेद शेख (सर्व रा. कानगाव, ता. दौंड, जि. पुणे) या ७ जणांविरुद्ध गुन्हा दाखल करण्यात आला आहे.
या घटनेचा पुढील तपास यवत पोलीस स्टेशनचे पोलीस निरीक्षक हेमंत शेडगे यांच्या मार्गदर्शनाखाली पोलीस हवालदार देवकाते हे करीत आहेत.
