पुणे : शहर व लगतच्या परिसरात लूटमार करणाऱ्या चोरट्याला पोलिसांनी मंगळवारी (दि. २९) अटक केली. त्याच्याकडून दोन पिस्तुले जप्त करण्यात आली आहेत. नवी पेठेतील शास्त्री रस्ता परिसरात ही कारवाई करण्यात आली. रफिक सलीम खान (वय ३६, रा. जीवलग हाऊसिंग सोसायटी, निगडी) असे अटक करण्यात आलेल्या चोरट्याचे नाव आहे.
नवी पेठ परिसरात पादचारी महिलेच्या गळ्यातील दागिने हिसकावून नेण्याचा गुन्हा नुकताच उघडकीस आला. त्याबाबतच्या पोलीस तपासात रफिकचे नाव पुढे आले. विश्रामबाग पोलीस ठाण्याच्या पथकाने त्याचा माग काढून त्याला बेड्या ठोकल्या. त्याच्या घरातून सोन्याची साखळी, दोन पिस्तुले व चार काडतुसे जप्त करण्यात आली. त्याच्याविरुद्ध यापूर्वी खून, खुनाचा प्रयत्न, लूटमार, मारामारी असे गंभीर स्वरूपाचे गुन्हे दाखल आहेत.
