राजेंद्रकुमार शेळके
हडपसर, (पुणे) : हडपसर येथील अण्णासाहेब मगर महाविद्यालयाची माजी विद्यार्थी संघटना विद्यार्थ्यांसाठी चांगले काम करत असून कोणत्याही शिक्षण संस्थेचा नावलौकिक त्यांच्या विद्यार्थ्यांच्या कर्तृत्वावर ठरत असतो. माजी विद्यार्थ्यांच्या यशोगाथा आजी विद्यार्थ्यांना प्रेरणादायी ठरतील, असे प्रतिपादन राज्याचे उपमुख्यमंत्री तथा पुणे जिल्हा शिक्षण मंडळाचे अध्यक्ष अजित पवार यांनी केले.
पुणे जिल्हा शिक्षण मंडळाचे अण्णासाहेब मगर महाविद्यालयाच्या माजी विद्यार्थ्यांच्या कर्तुत्वाची यशोगाथा ‘स्टोरीज ऑफ सक्सेस’ (Stories of Success) या पुस्तकाचे प्रकाशन समारंभ विधानभवन येथे राज्याचे उपमुख्यमंत्री तथा पुणे जिल्हा शिक्षण मंडळाचे अध्यक्ष अजित पवार यांच्या शुभहस्ते व माजी विद्यार्थी संघटनेचे अध्यक्ष सुरेशआण्णा घुले, विभागीय आयुक्त डॉ. चंद्रकांत पुलकुंडवार, महाविद्यालयाचे प्राचार्य व सावित्रीबाई फुले पुणे विद्यापीठाच्या व्यवस्थापन परिषदेचे सदस्य डॉ. नितीन घोरपडे, पुस्तकाचे संपादक डॉ. प्रवीण ससाणे यांच्या उपस्थितीत झाले. प्रास्ताविक माजी विद्यार्थी संघटनेचे अध्यक्ष सुरेशआण्णा घुले यांनी केले.
या पुस्तकात एकशे एकोणसत्तर माजी विद्यार्थ्यांच्या यशोगाथांचा समावेश असून यात आजी-माजी नगरसेवक, समाजकार्य करणारे कार्यकर्ते शास्त्रज्ञ संशोधक, उद्योजक, प्राध्यापक, शिक्षक, खेळाडू, पोलीस आणि सैन्यदलातील अधिकारी, कायदेतज्ञ, खेळाडू इत्यादींचा समावेश असून दिवंगत हरी नरके, सीए मच्छिद्र कामठे यांच्यादेखील यशोगाथा संपादित केल्या असल्याचे प्राचार्य डॉ. नितीन घोरपडे यांनी सांगितले.
या प्रसंगी शास्त्रज्ञ डॉ. जयंत टिळेकर, शिवछत्रपती क्रीडा पुरस्कार प्राप्त राजेंद्र राऊत, कृष्णकांत कोबल, माजी विद्यार्थी संघटनेचे सचिव प्रा. नितीन लगड, उपप्राचार्य डॉ. प्रशांत मुळे, प्रा. अनिल जगताप, डॉ. नाना झगडे, प्रा. ऋषिकेश मोरे आदी उपस्थित होते. कार्यक्रमाचे सूत्रसंचालन प्रा. नितीन लगड यांनी केले तर आभार कृष्णकांत कोबल यांनी मानले.
