शिरूर: शिरूर तालुक्यातील (Shirur News) डोंगरगण येथील जिल्हा परिषद शाळेतील (Pune News) शिक्षक पप्पू उर्फ योगेश मोहन खोमणे आणि त्याचा मावस भाऊ दगडू उर्फ आदेश धोंडीबा खोमणे यांनी 2020 साली शेतकरी शिवराम दगडू खोमणे यांना गंभीर मारहाण केल्याप्रकरणी मा. शिरूर कोर्टाने भारतीय दंड संहिता कलम 326, 324, 34 अंतर्गत एक वर्ष दोन महिने सक्तमजुरी व प्रत्येकी 10 हजार रुपयांचा दंड अशी शिक्षा सुनावली आहे.
शिक्षकी पेशा हा संस्कार, जबाबदारी आणि नैतिकतेवर आधारित असला तरी गुन्ह्यात दोषी ठरलेला शिक्षक सेवेत राहणे म्हणजे शिक्षकी सन्मानाचा अपमान ठरणार असल्याने, सामाजिक कार्यकर्ते व स्थानिक नागरिक यांच्याकडून तात्काळ सेवा समाप्तीची मागणी करण्यात आली आहे. महाराष्ट्र नागरी सेवा (शिस्त व अपील) नियम 1979 नुसार, गुन्ह्यात दोषी ठरलेला कर्मचारी “नैतिक अध:पतन” श्रेणीत मोडतो, त्यामुळे संबंधित शिक्षकाची सेवा समाप्त करणे आवश्यक असल्याचे मत व्यक्त करण्यात आले आहे.
4 वर्षांच्या न्याय प्रक्रियेनंतर मिळालेल्या या निर्णयाबद्दल शेतकरी शिवराम दगडू खोमणे म्हणाले, “मी गरीब शेतकरी माणूस आहे. 4 वर्षे न्यायासाठी धावपळ केली. अन्याय करणाऱ्यांविरुद्ध शेवटी सत्य जिंकलं, हाच माझ्यासाठी सर्वात मोठा दिलासा आहे. माझ्यासारख्या सामान्य माणसालाही न्याय मिळतो हे या निकालाने दाखवून दिलं.”
ॲड. विजय सावंत म्हणाले, “हा निकाल ठोस पुरावे आणि साक्षीदारांच्या जबाबांवर आधारित असून, समाजासाठी न्यायप्रक्रियेवरील विश्वास दृढ करणारा आहे,” तर सामाजिक कार्यकर्ता निलेश वाळुंज यांनी या निकालावर भर देत सांगितले की, हा निकाल अन्यायाविरुद्ध लढणाऱ्या सामान्य नागरिकासाठी प्रेरणादायी ठरला असून ग्रामीण भागात न्याय मिळविण्याची शक्यता अधिक बळकट झाली आहे.
