चंद्रपूर: राज्यात लाचलुचपत प्रतिबंधक विभागाकडून (एसीबी) भ्रष्ट अधिकाऱ्यांविरोधात सुरू असलेल्या धडक कारवाईत आणखी एका प्रकरणाचा पर्दाफाश झाला आहे. चंद्रपूर जिल्ह्यातील भद्रावती वनपरिक्षेत्र कार्यालयात लाचेची मागणी करणाऱ्या दोन वन अधिकाऱ्यांसह एका खासगी व्यक्तीला एसीबीने रंगेहात अटक केली आहे. या कारवाईमुळे वन विभागात एकच खळबळ उडाली आहे.
मिळालेल्या माहितीनुसार, तक्रारदार घराच्या बांधकामासाठी ट्रॅक्टरमधून अवैधरित्या वाळू वाहतूक करत होता. ही वाहतूक वन विभागाच्या पथकाच्या निदर्शनास आल्यानंतर संबंधित ट्रॅक्टरवर कारवाई करण्यात आली. मात्र, जप्त केलेले वाहन लवकर सोडवून देण्यासाठी वन विभागातील कर्मचाऱ्यांनी तक्रारदाराकडे 20 हजार रुपयांच्या लाचेची मागणी केल्याचा आरोप आहे.
तक्रारदाराने याबाबत चंद्रपूर येथील लाचलुचपत प्रतिबंधक विभागाकडे तक्रार दाखल केली. तक्रारीची पडताळणी केल्यानंतर एसीबीने सापळा रचला. ठरल्याप्रमाणे लाचेची रक्कम स्वीकारताना भद्रावती वनपरिक्षेत्रातील वनपाल कोमल घुगलोत, वनरक्षक संदीप पारवे आणि लाचेची रक्कम स्वीकारण्यासाठी मध्यस्थ म्हणून आलेला खासगी व्यक्ती ललित नागपुरे यांना एसीबीच्या पथकाने रंगेहात ताब्यात घेतले.
या तिघांविरुद्ध भ्रष्टाचार प्रतिबंधक कायद्यानुसार गुन्हा नोंदविण्यात आला असून पुढील तपास चंद्रपूर येथील एसीबीकडून सुरू आहे. राज्यभरात सुरू असलेल्या एसीबीच्या कारवाईत शिपायापासून ते वरिष्ठ अधिकाऱ्यांपर्यंत अनेक जणांवर कारवाई होत असून, आता वन विभागातील या प्रकरणामुळेही सरकारी यंत्रणेत खळबळ उडाली आहे.
