मुंबई: देशभरात नीट (NEET) पेपरफुटी प्रकरणावरून निर्माण झालेल्या संतापानंतर केंद्रीय शिक्षणमंत्री धर्मेंद्र प्रधान यांना राजीनामा द्यावा लागला. या घडामोडी ताज्या असतानाच आता महाराष्ट्र लोकसेवा आयोगाच्या (MPSC) औषध निरीक्षक (फूड अँड ड्रग्स इन्स्पेक्टर) पदाच्या परीक्षेचा पेपर फुटल्याचा गंभीर आरोप राष्ट्रवादी काँग्रेस (शरद पवार गट)चे आमदार रोहित पवार यांनी केला आहे. या पार्श्वभूमीवर त्यांनी अन्न व औषध प्रशासन विभागाचे आयुक्त तुकाराम मुंढे यांची भेट घेऊन स्वतंत्र, निष्पक्ष आणि वेळबद्ध चौकशीची मागणी केली. यासंदर्भातील निवेदनही त्यांनी आयुक्तांना सादर केले.
रोहित पवार यांनी दिलेल्या माहितीनुसार, २२ मार्च २०२६ रोजी झालेल्या औषध निरीक्षक पदाच्या परीक्षेबाबत अनेक तक्रारी, डिजिटल पुरावे आणि सोशल मीडियावरील माहितीमुळे पेपरफुटीचा संशय अधिक गडद झाला आहे. परीक्षेच्या दोन दिवस आधी कथित प्रश्नपत्रिका व्हॉट्सअॅप स्टेटसवर फिरल्याचा आरोप असून, त्यातील अनेक प्रश्न प्रत्यक्ष परीक्षेतील प्रश्नांशी जुळत असल्याचा दावा करण्यात आला आहे.
सोशल मीडियावर “१०० पैकी ९० प्रश्न जुळले” आणि मोबाईलच्या माध्यमातून प्रश्नपत्रिका उपलब्ध झाल्याचे दावेही मोठ्या प्रमाणात व्हायरल झाले आहेत. तसेच २० मार्च रोजी ज्याला कथित प्रश्नपत्रिकेचे फोटो पाठवण्यात आले, त्या उमेदवाराला परीक्षेत उच्च गुण मिळाल्याचाही आरोप करण्यात आला आहे. या सर्व घडामोडींमुळे भरती प्रक्रियेच्या पारदर्शकतेवर प्रश्नचिन्ह उपस्थित झाले असून लाखो स्पर्धा परीक्षार्थींमध्ये संभ्रमाचे वातावरण निर्माण झाले आहे.
दरम्यान, तुकाराम मुंढे यांनी हा विषय एमपीएससीच्या अखत्यारित येत असल्याने उपलब्ध सर्व कागदपत्रे आयोगाकडे पाठवली जातील आणि आयोग आवश्यक ती कारवाई करेल, असे आश्वासन दिल्याचे रोहित पवार यांनी सांगितले. तसेच चौकशी पूर्ण होईपर्यंत भरती प्रक्रिया आणि नियुक्त्या स्थगित कराव्यात, गैरव्यवहार सिद्ध झाल्यास परीक्षा रद्द करून नव्याने परीक्षा घ्यावी, अशीही त्यांनी मागणी केली आहे.
