पुणे : हडपसर परिसरात लोखंडी हातोडी आणि दगडाने मारहाण करून एका व्यक्तीची हत्या केल्याप्रकरणी आरोपीला जन्मठेपेची शिक्षा सुनावण्यात आली आहे. बापू पांडुरंग बाबर (वय ४५) असे शिक्षा झालेल्या आरोपीचे नाव आहे. शिवाजीनगर येथील अतिरिक्त जिल्हा व सत्र न्यायालय क्रमांक ३ मध्ये सोमवारी (दि. १९ ऑक्टोबर २०२६) या प्रकरणाचा निकाल देण्यात आला. न्यायालयाने आरोपीला भारतीय दंड विधानाच्या कलम ३०२ अंतर्गत दोषी ठरवत जन्मठेप आणि पाच हजार रुपयांचा दंड ठोठावला. दंड न भरल्यास सहा महिन्यांच्या अतिरिक्त साध्या कारावासाची शिक्षाही सुनावण्यात आली.
या प्रकरणात अनिल दादा पवार (वय ३४, रा. काळेपडळ, हडपसर) यांची हत्या झाली होती. २९ डिसेंबर २०२० रोजी सायंकाळी साडेसहा वाजण्याच्या सुमारास चहाची टपरी बंद करून घरी गेलेले फिर्यादी आकाश बन्सी सरोदे यांचे वडील दुसऱ्या दिवशी सकाळी टपरी उघडण्यासाठी आले होते. त्यावेळी ३० डिसेंबर रोजी सकाळी साडेआठच्या सुमारास टपरीपासून सुमारे ५० फूट अंतरावर एक व्यक्ती रक्ताच्या थारोळ्यात पडल्याचे त्यांच्या लक्षात आले. त्यांनी मुलाला याबाबत फोनवरून माहिती दिली.
आकाश सरोदे यांनी घटनास्थळी जाऊन पाहणी केली असता संबंधित व्यक्तीच्या चेहऱ्यावर, कपाळावर, डोक्यावर आणि गळ्यावर गंभीर जखमा दिसून आल्या. घटनास्थळी रक्ताने माखलेली लोखंडी हातोडीही आढळली. पोलिसांनी जखमी व्यक्तीला उपचारासाठी ससून रुग्णालयात नेले; मात्र डॉक्टरांनी तपासणीपूर्वीच त्याचा मृत्यू झाल्याचे घोषित केले. खिशात सापडलेल्या आधारकार्ड आणि वाहनचालक परवान्याच्या आधारे मृत व्यक्तीची ओळख अनिल पवार अशी पटली.
याप्रकरणी हडपसर पोलीस ठाण्यात गुन्हा क्रमांक १७८०/२०२० नोंदवण्यात आला होता. सरकारी पक्षातर्फे संतोषकुमार पताळे आणि अनिलकुमार वर्मा यांनी काम पाहिले. सहाय्यक पोलीस निरीक्षक रत्नदीप गायकवाड यांनी तपास केला. वरिष्ठ पोलीस निरीक्षक हेमंत पाटील यांच्या मार्गदर्शनाखाली न्यायालयीन कामकाजासाठी पोलीस पथकाने सहकार्य केले.
