न्हावरे : न्हावरे-शिक्रापूर रस्त्यावर उरळगाव परिसरातील इंडियन ऑइल पेट्रोल पंपासमोर रविवारी (ता.१५) सकाळी सुमारे १० वाजण्याच्या सुमारास खाजगी लक्झरी बस आणि आयशर टेम्पो ट्रक यांच्यात भीषण अपघात झाला. बसच्या पुढील चालकाच्या बाजूचा टायर अचानक फुटल्याने चालकाचे नियंत्रण सुटले आणि बस थेट समोरून येणाऱ्या आयशर टेम्पोवर जाऊन आदळली. या विचित्र अपघातात दोन्ही वाहनांचे मोठ्या प्रमाणावर नुकसान झाले असून, दोन्ही वाहनांचे चालक गंभीर जखमी झाले आहेत. सुदैवाने या अपघातात कोणतीही जीवितहानी झाली नाही.
या अपघातात लक्झरी बसचालक मुंजाजी दशरथ आंधळे (वय २३, रा.येळम, ता.परळी, जि.बीड) आणि आयशर टेम्पोचालक पोपट निवृत्ती भोंडवे (वय ३८, रा.सुपा, ता.बारामती, जि.पुणे) हे गंभीर जखमी झाले आहेत. दोघांनाही उपचारासाठी शिरूर येथील श्री गणेशा हॉस्पिटलमध्ये दाखल करण्यात आले असून, त्यांच्यावर अतिदक्षता विभागात (आयसीयू) उपचार सुरू आहेत.
मिळालेल्या माहितीनुसार, संबंधित खाजगी बस न्हावरे मार्गे बीडच्या दिशेने जात असताना अचानक तिचा पुढील टायर फुटला. त्यामुळे बसचालकाचे वाहनावरील नियंत्रण सुटून बसची शिक्रापूरच्या दिशेने जाणाऱ्या आयशर टेम्पोला जोरदार धडक बसली. दरम्यान, अपघातानंतर रस्त्यावर वाहनांच्या लांबच-लांब रांगा लागल्याने मोठी वाहतूक कोंडी निर्माण झाली होती. यावेळी न्हावरे दूरक्षेत्र पोलीस ठाण्याचे हवालदार अशोक शिंदे आणि पोलीस अशोक चितारे यांनी तत्परतेने घटनास्थळी धाव घेत वाहतूक सुरळीत केली.
विशेष म्हणजे, अपघातग्रस्त लक्झरी बसमध्ये एकही प्रवासी नसल्याने मोठा अनर्थ टळला. भीषण अपघातातून जीवितहानी टळल्याने नागरिकांनी सुटकेचा निःश्वास सोडला. या घटनेचा पुढील तपास न्हावरे पोलीस करीत आहेत.
