मुंबई : माझे नाव, फोटो किंवा वैयक्तिक ओळख पूर्वपरवानगीशिवाय वापरल्यास संबंधितांविरोधात कायदेशीर कारवाई केली जाईल, असा स्पष्ट इशारा महाराष्ट्र राज्य महिला आयोगाच्या माजी अध्यक्षा रुपाली चाकणकर यांनी दिला आहे. आपल्या नावाचा किंवा व्यक्तिमत्त्वाचा वापर करून कोणताही चित्रपट, व्हिडिओ, रील अथवा जाहिरात तयार करू नये, असेही त्यांनी स्पष्ट केले आहे. सोशल मीडिया प्लॅटफॉर्म ‘एक्स’वर पोस्ट करून त्यांनी ही भूमिका मांडली.
रुपाली चाकणकर यांनी पोस्टमध्ये म्हटले आहे की, त्यांच्या पूर्वपरवानगीशिवाय कोणत्याही व्यक्तीने त्यांचे नाव, फोटो, वैयक्तिक ओळख किंवा स्वतःला सादर करण्याची विशिष्ट शैली व्यावसायिक अथवा वैयक्तिक फायद्यासाठी वापरू नये.
तसेच त्यांच्या नावाचा किंवा व्यक्तिमत्त्वाचा आधार घेऊन चित्रपट, व्हिडिओ, रील, टीझर, प्रमोशनल साहित्य किंवा अन्य कोणताही कंटेंट तयार करून प्रसिद्ध करू नये, असे त्यांनी बजावले आहे.
अशा प्रकारे परवानगीशिवाय वैयक्तिक ओळखीचा वापर केल्यास संबंधितांविरोधात दिवाणी आणि फौजदारी कारवाई केली जाईल, असे चाकणकर यांनी म्हटले आहे. याशिवाय आक्षेपार्ह साहित्य जप्त करण्याची मागणीही केली जाईल, असा इशारा त्यांनी दिला आहे.
भोंदू बाबा अशोक खरात याच्याशी संबंधित प्रकरणामुळे रुपाली चाकणकर चर्चेत आल्या होत्या. या प्रकरणात त्यांचे नाव समोर आल्यानंतर त्यांना राज्य महिला आयोगाच्या अध्यक्षपदाचा राजीनामा द्यावा लागला होता. या प्रकरणाशी संबंधित काही फोटो आणि व्हिडिओ सोशल मीडियावर मोठ्या प्रमाणात व्हायरल झाले होते.
दरम्यान, ‘महाराष्ट्र एपस्टीन फाईल्स’ हा चित्रपट लवकरच प्रेक्षकांच्या भेटीला येणार असल्याची चर्चा आहे. या चित्रपटात अभिनेत्री दीपाली सय्यद भूमिका साकारत असल्याची माहिती समोर आली आहे. या पार्श्वभूमीवर आपल्या नावाचा किंवा व्यक्तिमत्त्वाचा परवानगीशिवाय वापर होऊ नये, यासाठी चाकणकर यांनी हा इशारा दिल्याचे म्हटले जात आहे.
