इंदापूर : इंदापूर तालुक्यातील भवानीनगर येथील श्री छत्रपती सहकारी साखर कारखान्याने २०२६-२७ च्या गळीत हंगामात ऊस उत्पादक शेतकऱ्यांना प्रतिटन ३ हजार ५०१ रुपये पहिला हप्ता एकरकमी देण्याचा निर्णय घेतला आहे. कारखान्याचे अध्यक्ष पृथ्वीराज जाचक, उपाध्यक्ष शिवाजी निंबाळकर आणि संचालक मंडळाने ही माहिती दिली. सोमवारी, १९ ऑक्टोबर रोजी झालेल्या संचालक मंडळाच्या बैठकीत हा निर्णय घेण्यात आला. कारखान्याचा कारभार पारदर्शकपणे चालवण्यासाठी प्रयत्न सुरू असून, शेतकऱ्यांनी चालू हंगामातील आपला संपूर्ण ऊस श्री छत्रपती कारखान्याला द्यावा, असे आवाहन संचालक मंडळाने केले आहे. राज्याच्या उपमुख्यमंत्री सुनेत्रा अजितदादा पवार आणि कृषिमंत्री दत्तात्रेय भरणे यांच्या मार्गदर्शनाखाली कारखान्याचे कामकाज सुरू असल्याचेही यावेळी सांगण्यात आले.
चालू गळीत हंगामात १२ लाख मेट्रिक टन ऊस गाळपाचे उद्दिष्ट कारखान्याने ठेवले आहे. हे उद्दिष्ट पूर्ण करण्यासाठी सभासद आणि परिसरातील शेतकऱ्यांनी सहकार्य करावे, असे आवाहन करण्यात आले. शेतकऱ्यांचा विश्वास संपादन करण्यासाठी कारखान्याने ‘हजार किलोचाच टन, वजन चोख, पैसे रोख, छत्रपतीला ऊस घाला बिनधोक’ अशी नवी टॅगलाइन तयार केली आहे. कारखान्याचे वजनकाटे अचूक असून सभासद आणि गेटकेनच्या शेतकऱ्यांना समान दर दिला जात असल्याचे संचालक मंडळाने स्पष्ट केले.
ऊस गाळपातही कारखान्याने चांगली कामगिरी केली आहे. रविवारी, १८ ऑक्टोबर रोजी एका दिवसात ८ हजार ६५० टन उसाचे गाळप करण्यात आले. तर आठ दिवसांत एकूण ४७ हजार २१० टन गाळपाचा टप्पा पूर्ण झाला आहे. कारखाना पूर्ण क्षमतेने सुरू असल्याचे व्यवस्थापनाने सांगितले. दरम्यान, कारखान्यातील कामगारांसाठी १५ टक्के बोनस जाहीर करण्यात आला आहे. या निर्णयाचा सुमारे ८५० कामगारांना लाभ मिळणार आहे. बोनसपैकी १० टक्के रक्कम दिवाळीपूर्वी, तर उर्वरित ५ टक्के रक्कम मकरसंक्रांतीला कामगारांच्या खात्यात जमा केली जाणार आहे. त्यामुळे कामगारांची दिवाळी गोड होणार आहे.
