उरुळी कांचन, (पुणे) : येथील अवघ्या 10 महिने 13 दिवसांच्या विवान विजेंद्र बडेकर या बालकाने एका अत्यंत अनोख्या आणि चकित करणाऱ्या कामगिरीची नोंद करत थेट ‘इंटरनॅशनल बुक ऑफ रेकॉर्ड्स’मध्ये आपले नाव सोनेरी अक्षरांनी कोरले आहे. लहान बालकांमधील बुद्धिमत्ता आणि स्मरणशक्तीच्या श्रेणीत हा जागतिक विक्रम नोंदवला गेला आहे.
मिळालेल्या माहितीनुसार, गत 2 सप्टेंबर 2026 रोजी चिमुकल्या विवानने फ्लॅशकार्ड्सच्या सहाय्याने विविध ऑटोमोबाईल (वाहन) कंपन्यांचे 25 पैकी तब्बल 22 लोगो क्षणात न चुकता अचूक ओळखून हा विश्वविक्रम रचला. वयाच्या अवघ्या दहाव्या महिन्यात मुलांमध्ये अशी तुफान स्मरणशक्ती आणि बौद्धिक कुवत पाहायला मिळणे, हे खरोखरच अचंबित करणारे आहे.
दरम्यान, विशेष आनंदाची गोष्ट म्हणजे, येत्या 20 ऑक्टोबर 2026 रोजी विवान आपला पहिला वहिला वाढदिवस साजरा करत आहे. वाढदिवसाच्या अगदी काही दिवस आधीच या चिमुकल्याने आंतरराष्ट्रीय स्तरावर भारताचा आणि पुण्याचा मान उंचावल्याने विवानच्या आई-वडिलांच्या आणि कुटुंबीयांच्या आनंदाला पारावार उरलेला नाही.
