– अमोल दरेकर
पुणे : जिल्ह्याच्या शिक्रापूर येथील तीन तरुणांसह एका महिलेवर काही अज्ञात इसमांनी मिळून अपहरण केले. त्यानंतर कारच्या डिग्गीत घालून अज्ञातस्थळी नेत त्यांना बेदम मारहाण केल्याची घटना समोर आली आहे. या तिघांना कारमधून अज्ञात स्थळी नेत लाठ्या काठ्या, कोयता आणि तलवारीसह हात पाय बांधून जबर मारहाण करण्यात आल्याने सर्वत्र एकच खळबळ उडाली आहे. या घटनेचा व्हिडिओही सोशल मीडियावर व्हायरल होत आहे. आरोपींचा शोध पुणे पोलीस करत आहेत.
या घटनेतील मारहाणीचे व्हिडिओ व्हायरल झाल्यानंतर पुणे ग्रामीण एसपी पंकज देशमुख यांनी गुन्हा दाखल करण्याचे आदेश दिले आहेत. आरोपींना पकडण्यासाठी 2 पोलीस पथक रवाना देखील झाले आहेत. पैशाच्या देवाणघेवाणीतून हा मारहाणीचा प्रकार घडल्याची माहिती मिळत आहे. आरोपी आणि पीडित हे दोन्ही कुंटुंब शिक्रापूर परिसरात राहतात.
या घटनेसंदर्भात पीडितांनी दिलेल्या माहितीनुसार, शनिवारी रात्री तीन गाड्यांमधून आलेल्या काही जणांनी तिघांना उचलून घेऊन गेले होते. त्यांना मारहाण केली. तिघांना वेगवेगळ्या खोल्यात ठेवण्यात आलं. त्यांना कोयते आणि तलवारीने मारले. यावेळी एका पीडित पुरुषाने सांगितले की, दोघांना उचलून हातपाय बांधून डिगीत ठेवण्यात आले. आमच्याकडून दारुसाठी पैसे मागण्यात आले. आणि आमचे फोन उचलून ठेवले. आमचे हातपाय बांधून लाकडाने आणि कोयत्याने मारहाण करण्यात आली. तुम्ही चोरी केलात असं म्हणत आम्हाला मारण्यात आलं.
व्हायरल होत असलेल्या व्हिडिओमध्ये मारहाण करणारे पीडितांना कोणत्या जातीचा आहेस असं विचारत असल्याचेही ऐकू येत आहे. इतरांची नावे काय आहेत? तुझी जात काय? अशी विचारणआ केली जात आहे. पीडित व्यक्तीचे पाय बांधून त्या व्यक्तीला खिडकीला लटकवण्यात आले होते.
