उरुळी कांचन: लोकसभा निवडणुकीच्या पार्श्वभूमीवर राज्यातील राजकीय वातावरण चांगलच गरम झालं आहे. लोकसभेच्या उमेदवारांच्या प्रचारासाठी अनेक दिग्गज नेत्यांनी प्रचारसभांचा धडाका लावला आहे. शिरूर लोकसभा निवडणुकीच्या पार्श्वभूमीवर उरुळी कांचन (ता. हवेली) येथे शरद पवार यांची रविवारी (ता. २८) पाच वाजण्याच्या सुमारास सभा होणार आहे, अशी माहिती राष्ट्रवादी कॉग्रेस (शरदचंद्र पवार गट) पार्टीचे उरुळी कांचन शहराध्यक्ष रामदास तुपे व सरपंच भाऊसाहेब कांचन यांनी दिली आहे.
शिरूर लोकसभा मतदार संघात राष्ट्रवादी काँग्रेस (शरदचंद्र पवार गट), ठाकरे गट आणि काँग्रेसकडून अधिकृत उमेदवार डॉ. अमोल कोल्हे निवडणुकीच्या रिंगणात उभे आहेत. कोल्हे यांच्या प्रचारार्थ शरद पवार यांची उरुळी कांचन येथील बस स्थानकाच्या परिसरात सभा होणार आहे. या सभेला राष्ट्रवादी कॉग्रेसचे प्रदेशाध्यक्ष जयंत पाटील, खासदार अमोल कोल्हे, शिरूर हवेलीचे आमदार अशोक पवार, पुरंदर हवेलीचे आमदार संजय जगताप, माजी आमदार जगन्नाथ शेवाळे, प्रकाश म्हस्के, सचिन आहेर, देविदास भन्साळी, शरद पवार गटाचे हवेली तालुकाध्यक्ष संदीप गोते आदी मान्यवर उपस्थित राहणार आहेत.
याबाबत बोलताना रामदास तुपे व भाऊसाहेब कांचन म्हणाले, उरुळी कांचन येथील शरद पवार यांच्या सभेसाठी जय्यत तयारी करण्यात आली आहे. सभेच्या ठिकाणी भव्य मंडप उभारण्यात आला आहे. सभेला शिरूर, हवेली तालुक्यातील हजारो नागरिक सभेला उपस्थित राहणार आहे. त्यामुळे सभेला येणाऱ्या नागरिकांच्या गाड्यांच्या पार्किंगसाठी स्वतंत्र व्यवस्था करण्यात आली आहे. तसेच सभेच्या ठिकाणी पोलिसांकडून कडक बंदोबस्त ठेवण्यात येणार आहेत. तसेच नागरिकांसाठी पाण्याची व्यवस्थादेखील केली आहे.
दरम्यान, शिरूर लोकसभा मतदार संघात खरी लढत डॉ. अमोल कोल्हे व भाजपा-शिवसेना-राष्ट्रवादी-आरपीआय- मित्र पक्ष महायु‌तीचे अधिकृत उमेदवार शिवाजीराव आढळराव पाटील यांच्यात होणार आहे. त्यामुळे उरुळी कांचन येथील सभेत शरद पवार आपली भूमिका काय मांडणार व मतदानाचा कौल कसा आपल्या बाजूने फिरवणार ते पाहणे अत्यंत महत्वाचे ठरणार आहे. त्यामुळे या सभेकडे सर्वांचे लक्ष लागले आहे.
