पुणे : पुण्यातील महापालिका भवन परिसरातील नदीपत्रात मध्यरात्री एक तरुण पडल्याची धक्कादायक बातमी समोर आली आहे. छत्रपती शिवाजी पुलाजवळ एक जण नदीत पडल्याची माहिती अग्निशमन दलाच्या नियंत्रण कक्षाकडून कसबा अग्निशमन केंद्राला कळविण्यात आली. या घटनेची माहिती मिळताच अग्निशमन दलाचे वाहन रवाना करण्यात आले आहे.
याबाबत अधिक माहिती अशी कि, अग्निशमन दलाचे जवान घटनास्थळी पोहोचताच त्यांनी एक तरुण नदीपात्रातील पाण्याच्या प्रवाहामध्ये अडकल्याचे पाहिले. त्यावेळी दोरी आणि लाईफ जॅकेटचा वापर करून पाच मिनिटात तरुणाची सुखरुप सुटका करण्यात जवानांना यश आले आहे. जीवरक्षक राजू काची यांनी मदतकार्यात मोलाचे सहकार्य केले आहे.
सोमनाथ निशाद असे पाण्यातून सुटका करण्यात आलेल्या तरुणाचे नाव आहे. तो मूळचा उत्तर प्रदेशतील आहे. तो पाण्यात कसा पडला याची माहिती मिळू शकली नाही. कसबा अग्निशमन केंद्रातील वाहनचालक संतोष चौरे तसेच जवान हरिश बुंदेले, राजू जगदाळे, ज्ञानेश्वर गायकवाड, राजेंद्र महाडिक, आतिश नाईकनवरे, सनी लोखंडे यांनी ही कामगिरी केली.
