पुणे : अयोध्येमध्ये २२ जानेवारीला रामलल्लाची प्राणप्रतिष्ठा होणार आहे. या पार्श्वभूमीवर अवघ्या देशभरातील वातावरण राममय झाले आहे. राममंदिर प्रतिष्ठापनेनिमित्त सोमवारी देशभरात दिवाळी साजरी होणार आहे. अयोध्येत राममंदिरामध्ये प्रतिष्ठापना होत असताना पुणेकर रामभक्तांचा आनंद द्विगुणित करण्यासाठी ‘श्रीराम’ असा शिक्का असलेले केशरयुक्त पेढे चितळे बंधू मिठाईवाले यांनी विक्रीसाठी आणले आहेत. या पेढ्यांना रामभक्तांकडून मोठी मागणी आहे. राममंदिर निर्मितीचा आनंद ‘गोड’ करण्यासाठी पेढ्यांची ही भेट देण्यात आली आहे. पुढील दोन दिवस हे पेढे उपलब्ध असतील.
‘श्रीराम’ पेढा केशरयुक्त असून, २० ग्रॅम वजनाचा आहे. एका किलोमध्ये साधारणपणे ५० पेढे येतात. ७०० रुपये किलो असा श्रीराम पेढ्यांचा दर आहे. आणखी दोन दिवसांत या पेढ्यांना मागणी वाढण्याची शक्यता असून, त्यादृष्टीने पेढे निर्मितीची तयारी ठेवली आहे. दोन दिवसांपासून या पेढ्यांना मागणी वाढत आहे. आमची दुकाने आणि फ्रॅंचायजी अशा ३५ दालनांमध्ये या पेढ्यांना रामभक्तांकडून पसंती मिळत आहे, अशी माहिती संजय चितळे यांनी दिली.
तुळशीबाग गणपती मंदिराजवळ सोमवारी पेढ्यांचे वाटप
राममंदिरातील राममूर्तीच्या प्रतिष्ठापनेचा आनंद व्यक्त करण्यासाठी मिठाई, फरसाण अँड डेअरी असोसिएशनच्या वतीने तुळशीबाग गणपती मंदिराजवळ सोमवारी सकाळी दहा वाजता रामभक्तांना पेढ्यांचे वाटप करण्यात येणार आहे.
-संजय चितळे, अध्यक्ष, मिठाई, फरसाण अँड डेअरी असोसिएशन
